Октябрь зурул цанния шиннай Ккуллал райондалий най дур армиялийн буцин чIун хьусса жагьилтурал цIуллу-сагъшиву ххал дигьлагьисса комиссиялул даву.
Ва комиссиялул даврия ва гьашину Ккуллал ва Лакрал районная армиялийн буцлациминнал хIакъираву ттухь бувсуна Аьралий комиссариатрал отделданул каялувчи Аьжуб Юсуповлул:
— Ккуллал райондалий яхъанахъисса 300 жагьил учIан багьлай бур комиссия буван. Вайннай комиссия буллалаву лахъи лагантIиссар октябрь зурул цанния декабрь зурул 25-нин. Гьашину ссуттил кIирагу райондалия аьралуннаву къуллугъ буван уцинтIиссар 15 жагьил. Вай жагьилтал личIи буллалисса чIумал, хIисавравун ласунтIиссар: ларайсса ва дянивсса кIулшиву думи, цIуллу-сагъшиврул чулухалу, щупирнал «В» ва «С» категория думи, военкоматрал счетрай автошкола къуртал бувми. Къуллугъ буллан вай тIайла буккантIиссар Аьрасатнал Калининградрая Владивостокрайн бияннин. Цалчинмур Дагъусттаннаясса команда тIайла дуккантIиссар ноябрь зуруй, — куна ванал.
