Увгьуну ур 63 къачагъ

Октябрьданул 9-нний Ма­хIачкъалалив НАК-рал председатель, Аьрасатнал ФСБ-лул директор Александр Бортниковлул каялувшиврий хьунни Национал антитеррорданул комитетрал батIаву.


Муний гьуртту хьунни гара кьини Москавлия бувкIсса АьФ-лул Национал гвардиялул аьралуннал федерал къуллугърал директор Виктор Золотов, АьФ-лул Силистталул комитетрал председатель Александр Бастрыкин, АьФ-лул виваллил иширттал министр Владимир Колокольцев, АьФ-лул цIуллушиву дуруччаврил министр Вероника Скворцова, СКФО-лул субъектирдал бакIчитал.

Микку махъ лахълай, Александр Бортниковлул бувсунни гьашину ихтиярду дуруччай органнал ва властьрал органнал цачIу дурсса давурттайну бювхъуну бушиву Ухссавнил Ккав­кказуллал федерал округрай террорданул журалийсса тахсирлувшивуртту кIилий чан дуван, 6 терактрал хьхьичIалу кьуркьуну дур, 63 бандит ва 142 миннал кумагчи увгьуну ур, 50 боевик ухлаган увну ур.

[dropcap]М[/dropcap]уницIунна личIлай дур дунияллул халкьуннал террористшиврул сакиншиннардал оьхIалсса ишру Ухссавнил Ккавкказнавунгу биян­ссар тIисса нигьачIаву. Микку чул бишлай бур, Гъанмур Машрикьуллал билаятирттай талай бивкIун, утти махъунмай зана хьуминнайн. Бортниковлул бусаврийну, чялишну дачин дуллай бур терроризмалул идеология жагьилтурал дянив. Террористътурал хIарачат буллай бур цала иширттавун хIала буххан буван балугъравун къабивсса оьрчI-бакIгу.

НАК-рал председательнал тапшур бунни цила чIумал ашкара дуллан террористътурая­сса нигьачIаву.
БатIаврий ххал бивгьунни цаймигу агьамсса масъалартту.