Сунгъурдул арс Абакаров Сани Оьрмулул 84 шинаву аьпалувух ивхьунни, ца цала жяматран акъассагу, лакрангу, чIявуссаннан кIулсса, бусраврай ва хIурматрай ивкIсса, итххявхсса хIакин-хирургСунгъурдул арс Абакаров Сани.
Сани увссар 1933 шинал майрал 9-нний Вираттиял шяраву Сунгъурдул ва Ижажал кулпатраву. Ванан кIилийнусса байранну дикIайссия Ххувшаврил кьини.
Гъумук школагу къуртал бувну, Сани увххун ур дуклан МахIачкъалалив медучилищалувун. Мугу къуртал бувну, увххун ур мединститутравун. Мединститут бувккуну махъ Сани тIайла увккун ур ххюра шинайсса хирургну зун Калугаллал областьрайн. Тичча зана хьуну мукьах зий ивкIун ур МахIачкъалалив Муххал ххуллул азарханалий хьхьичIунсса хирургну. Ва зий ивкIссар МахIачкъалаллал сайки циняв хъунисса азарханардай заведующийну.
Сани ия яла лахъмур категориялул хирург-хIакин, ия цалва хъирив нанисса хIакинтурансса эбратну, маслихIатчину, дус-ихтиварну. Цалла цIа дургьуну увкIсса инсан ванал, мурадрайнгу иян увну, зукьлай тIайла уккайссия.
Адаминал инсаннаву дикIан аьркинсса цинярдагу ххуйшивуртту ххишаланугу дия ванаву. Ва кIулнал, архIал зузинал, шяраваллил жяматрал дянив хъунмая ванал хIурматгу.
Дия Санинан дурккун диялсса хIурматрал грамотарттугу, бахшишругу. Ва лайкь хьуну ия «ДР-лул лайкь хьусса хIакин» тIисса цIанин.
Лавгунни жуятува Сани, дунияллух мякьну унува, дустурах ща увцун унува, цалва душварал, куявтурал, минная бивзминнал ччаврил вив лавсун унува.
Хъуннасса пашманшивугу кIидачIлай, жижара буллай буру душварахь, куявтурахь, вайнная бивзминнахь, махъсса цинявппагу агьлу-авладрахь. Махънал оьрмулий барачат бишиннав. Жуятува уцарчагу, Занная уцан къааннав, гьав нурданул дуцIиннав!
Вираттиял жямат
Хъуннасса кьурчIишивугу кIидачIлай, дакIнихтунусса жижара буллай буру Аьбдуллаев Сапарбаглухь ванал ххирасса ссурахъу Сани аьпалувух ишаврийн бувну. Цал бунагьирттал аьпа баннав, рухI бигьаний дишиннав. «Илчи» кказитрал коллектив
Гъужил душ Гъужиева Ульяна Вай гьантрай, жуятува личIи хьунни Ккурккуллал шяравасса ххаллилсса нитти-буттал ва бусравсса учительтурал душ Гъужиева Ульяна. Бувну бур Ульяна 1958 шинал Ккурккуллал шяраву. Школа къуртал бувну махъ бувххун бур Дагъусттаннал политех институтрал гидромелиоратив техникумравун. Институт бувккуну махъ мивува зий буссия чIярусса шиннардий. ДакI-аьмал аьчухсса Ульянал хIурмат бикIайва преподавательтурал ва студентътурал дянив. Ва цуппагу цила даву ххирасса ва дирчIан дурну дайсса зузала бикIайва. ТIул-тIабиаьт ххуйсса, хасиятрал бавкьусса Ульяна ххирасса бикIайва мачча-гъаннан ва чIахху-чIарахнан. Ульяна аьпалул шаврил кьурчIишиву кIидачIлай, жижара буллай буру арснахь, уссурссуннахь, махъсса гъан-маччанахь. РухI алжаннул ххари даннав. Ванин къабуллусса оьрму махъциривннан булуннав.
Ккурккуллал жямат
