Дагъусттаннал виваллил иширттал министерствалий хьунни 9 зурул лажиндарай дурмунил хIасиллу дуллалисса коллегиялул батIаву.

Шикку гьуртту хьунни виваллил иширттал министр, полициялул генерал-лейтенант Аьвдурашид МахIаммадов, Аьрасатнал МВД-лул Органнал ва подразделениярттал чIумуйсса оператив группировкалул каялувчи, полициялул полковник Владимир Домашев, Дагъусттаннал полициялул хъунама, полициялул полковник Дмитрий Гутыря, Аьрасатнал МВД-лул ВОГ-рал (чIумуйсса оператив группировка) хъунама, полициялул полковник Сергей Корнюшенко, Дагъусттаннал МВД-лул штабрал хъунама, виваллил службалул полковник Марат Макатов, Дагъусттаннал МВД-лучIасса Жяматийсса советрал хъунама Багьауттин МахIаммадов, шагьрурдал ва районнал виваллил иширттал отделлал каялувчитал.

Нанисса шинал 9 зурул дянив дурсса даврил хIасиллу дуллай, Аьвдурашид МахIаммадовлул кIицI лавгунни жяматийсса низам ва агьалинал мюхчаншиву дуруччаву ва тахсиркаршивурттан ххуллу кьукьаву мурадрай, хъуннасса даву дуршиву. ХьхьичIми шиннардий кунма гьашинугу ляличIисса къулагъа­с­райн лавсун бивкIшиву терроризмалийн ва экстремизмалийн къарши бацIаврил масъала.

— ХIакьинусса кьинигу жун баллай бур уттинин виваллил ишир­ттал органнал итталун къабагьсса жагьилтурая сакин хъана­хъисса «шанаши ячейкарттая». Чялишну ппив хъанай дур экстремизмалул ва терроризмалул идеология электрон СМИ-дайхчIин ва соцсетирдайхчIин. Гьашину, терроризмалийн къаршину бацIансса чараннугу ляхълай бунува, кIия полициялул зузала оьрмулуцIа хьунни, 6 зузалайн щавурду дирунни, — кунни Аьвдурашид МахIаммадовлул.

Министрнал бувсунни, аьмну ведомствалул даврил хIасиллу оькки­сса къархьушиву. Чан хьуну дур цаппара журалул тахсиркаршивуртту: ихтиярду дуру­ччай органнал зузалт оьрмурдацIа буван кьаст лахIаву, ивчIанну тIий инсан ивкIусса, инсаннал цIуллу-сагъшиврун захIматсса цIунцIияртту диян даву, хъямалашин, агьалинал хъус дацаву.
ЧIяру хьуну дур экономикалул аралуву ашкара дурсса тахсиркаршивуртту. Лайкьсса хьуну дур аьмну тахсиркаршивуртту ашкара даврил хIасиллугу. Дмитрий Гутырял бусласимунийн бувну, 9 зурул дянив ашкара дурну дур 9 азарда тахсиркаршиву, зевххуну бур закондалуцIун къабавкьуну ишакаш буллали­сса 300-ннийн бивсса битай ярагъ, миннува 26 автомат, 10 гранатомет, 1 пулемет, 129 пистолет, 103 ттупанча, мукунна 300 граната.

Цала ихтилатраву Владимир Домашевлул бувсунни цIанасса чIумал Дагъусттаннай зий бушиву Аьрасатнал субъектирдая гьан бувсса зузалт­рая сакин бувсса ЧIумуйсса оператив группа. Миннал агьаммур мурад бур терроризмалун ххуллу кьукьинсса, ярагъуннищалсса кьюкьравуми, ашкарагу бувну, бугьансса, закондалуцIун къабавкьуну, наркотикру, ярагъ ва пIякь учайсса затру ишакаш даврин ххуллу кьукьинсса, мукунма экономикалуцIун дархIусса тахсиркаршивуртту ашкара дансса чаран лякъинсса.

Цала-цала даврил хIасиллая бувсунни МВД-лул подразделениярттал ва районнал отделлал каялувчитурал. БатIаврил ахирданий министрнал чIурчIав дунни Дагъусттаннал виваллил ишир­ттал министерство террордания нигьачIаву дусса шартIирдай зий душиврий, мунийну цала зузалт­райн ххишалану гужгу багьлай бушиврий.