ХIажи Ссунгъуровлулмур «Дагъусттан»

МахIачкъалалив Национал библиотекалий, Республикалул «Самородки» тIисса цIанилусса проектрал лагрулий, хьунни художник ХIажи Ссунгъуровлул «Ттул Дагъусттан» тIисса цIанилусса выставка.
Му сакин дурну дия Республикалул Халкьуннал творчествалул къатлул.

[dropcap]В[/dropcap]аччиял шяравасса ХIажи Ссунгъуров сурат дишаврихун агьну ур махъату, пенсиялийн ув­ккун махъ. Муния шиннай дурагу 8 шин ларгун дунугу, ванал дирхьуну дур 200-нния лирчусса суратру. Миннувасса язими дия ва кьини ккаккиялун дирхьунугу. Художникнан хъунмурчIин ххирар инсантурал суратру дихьлан ва миннуву къачанни цIанихсса инсантуралми: Расул ХIамзатовлулсса, Апанни Къапиевлулсса, Фазу Аьлиевал­сса ва м.ц.

[dropcap]В[/dropcap]ыставка тIитIлай, хьхьичI­махъ лавхъуна ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадовал.
— ХIажинал цалла дирхьусса суратирттай, инсаннал лажин дакъасса, усттарну ккаккан дувай дакIгу, — увкуна ванил.

Ихтилатру ялагу бувна ДР-лул Художниктурал союзрал выставкартту дай залданул директор Амирхан МахIаммадовлул, АьФ-лул МИД-рал кафедралул доцент Владимир Аватковлул, искусствоведениялул кандидат Татьяна Петенинал ва цайминнал.
Выставкалийн бувкIун бия биялсса инсантал: художниктал, искусствоведтал, ХIажинал гъан-маччами, дустал, художникнал гьунарданул ясир бувми.