КIулссар жунма хъинмунищал бувкIми хъамалу бангу

Рамзан Кьадировлущал

Вай гьантрай Дагъусттаннайн увкIун уссия Аьрасатнал ММА-лул федерациялул хъунама Олег Тактаров. Ванайн хъамалу оьвкуну бия UFC-лул ию ХIабиб НурмахIаммадовлул.

Тактаров хьунаакьин бувкI­миннавух бия ХIабиблул ппу Аьвдулманап, ХIабиблул ссурахъу Шамил Завуров ва ММА-лул федерациялул Дагъусттаннал отделениялул каялувчи, тренер, жула лаккучу Аьвдулкарим Айгунов. Ванащал хьунни жул кутIасса ихтилатгу.

-ХIабиблул ва Макгрегордул бияврил хьхьичI чIявуя цу ххув хьунтIиссарив бусласими. Амма Олег Тактаровлул махъру дагъус­ттанлувтурахь дакIнийн щилащисса бия, му цукуннив жуятува жагъалану гъалгъа тIий ияхха? Мунал кумургу хIисавравун лавсун, цукунсса хьунабакьаву хьур?
-Тактаров Дагъусттаннай хъамалу хъанай уссия кIива гьантлий. ЖучIава уссаксса хIаллай ванал мина дирхьуну уссия ттул къушлий. Цалчинмур кьини кIюрххила лавгру Тарки-Тау зунттуйн. КIикку хьунабавкьуру ХIабиблущал ва Аьвдулманаплущал. Зарядка ва лечавуртту дурну махъ жул аьрххи-ххуллу багьуна Дарбантлив. Олег Тактаровлущал бувкIун буссия ванал тренер ва хьхьичIунсса дус­тал. Ккаккан барду хъамаллуран Нарын-Къала. Яла лавгру вайннан Сулакь неххал къума ратI кка­ккан дан, гиккурасса балугъирттал хозяйствалух бурган. Хъиривмур кьини ХIабиблущал ва Аьвдулманаплущал лавгру Къизилюртлив. Мурад Базаргановолул цIанийсса спортклубраву хьунабавкьуру жагьилсса спортсментуращал.

ХIабиб, Аьвдулкарим ва Олег

ХIабиблул бувцунну цува хъуна хьусса Кировлул шяравунгу. Хъамалу уссаксса хIаллай Олег Тактаровлун ккаккан дан хIарачат буварду жула эмаратсса тIабиаьтгу. КутIасса чIумул му­тталий Олеглул ва ХIабиблул лявкъунни дакIру цачIун дуллалисса ххуллурду. Аьвдулманаплул оьвкунни Олеглуйн Каспийскалий декабрь зуруй хьунтIисса Дунияллул дянив­сса самболул чемпионатрайнгу.

Олег Тактаров
ва Аьвдулкарим Айгунов

-Зу Мичиххичнавунгу лавгун бивкIун буру.
-На, жула Ккулатусса дунияллул чемпион Рамазан Рамазанов ва Олег Тактаров лавгссару Грознайлийнгу Рамзан Кьадировлул хъамалу оьвкуну. Ганал жу бувцунав Шали шагьрулийн, тикку «Вайнах» тIисса хъунма­сса спорткомплексрал шадлугърайсса тIитIавугу дурунни. Яла Кьадировлущал лавгру ганал резиденциялийнгу. ХIурматрай ва лавайсса даражалий хъамалу бунну. «Олег Тактаров, UFC-лул гьану бивзминнавухгу ивкIсса, дунияллул дянив­сса бяст-ччаллавухгу ххув хьусса, ттула хъамаличуну хьушиврий на рязину ура», — тIий ия Рамзан Кьадиров.

-Аьвдулманаплул хъамалу Макгрегордуйнгу оьвкуну бур. Му учIанавав?
-КъакIулли. Макгрегордулгу цалсса жаваб къадуллунни. Амма, цинявннан кIулссар зунттал халкьуннал дакIний хъинмунищал бувкIми хъиншиврий хъамалу бан кIулшивугу.

Ихтилат бувссар
Р. Къардашовлул