Комсомолданул инициативалийн бувну ряхцIалку шиннардий паччахIлугърай хIасул хъанан диркIссар студентътурая сакин дурсса строительтурал кьюкьри. Мунил дайдихьулул шинан хIисав дайссар 1959 шин.
Му шинал Ломоносовлул цIанийсса МГУ-лул 339 студент-физик гъинттулсса каникуллал чIумал лавгун ивкIссар Къазахъисттаннайсса цилиналул давурттайн. Муния махъ, шин дурккуну, ялу-ялун хъунна хъанан диркIссар кьюкьрал аьдадгу, географиягу. Яла хъунмур аргъ тIурча, хьуссар 60-ку — 80-ку шиннардий: студентътурал кьюкьри гьуртту хъанан диркIссар халкьуннал хозяйствалул хъуни-хъунисса объектирдай, «ударнай стройкардай». Му суккушин ккаллину диркIссар жагьилтал захIматрал адаптациялул хьун буллалисса сайки социал институтран – муксса хъунмасса бияла бивкIссар мунихь.
Студентътурал кьюкьрал иширацIун цIакь хьуну дуссия церемониал зумунусса лишаннугу, диркIссар хасъсса форма, «командир», «комиссар», «врач» «мастер» тIисса чичрурдугу дусса. Гьарца шинах итадакьайссия значокругу. Ми кьюкьрацIун хIасул хьусса романтикалул биялалий лявхъуну бикIайссия ляличIиссава балайрду, шеърирду. ЧIявуссаннан хIакьинугу дакIний бикIантIиссар «Яростный стройотряд» тIисса балай.
Му ххаллилсса школалувух бувкссар паччахIлугърай цIа дурксса инсантал, ишккаккулт. Ми стройотрядирттаву цивппа бивкIсса чIунну хъунмасса гъирарай ва кьадрулий дакIнийн дичлан бикIай: Владимир Путин, Дмитрий Медведев, Нурсултан Назарбаев, Сергей Лавров, Александр Бастрыкин, Юрий Лужков, Вячеслав Володин, Геннадий Зюганов ва чIявусса цаймигу.
Мура сияхIрай кIицI къалавгун кьабитан къахьунссар ми кьюкьраву бивкIсса жула Дагъусттанналми активистал ва сакиншинначиталгу: МахIаммадмирза МахIаммадов, Низами Казиев, ТIагьир Исмяилов, Сефер Аьлиев, Камил Мажидов, Абубакар Сулайманов, Вадим Данелян, Дибир ХIажиев, Ссупиян Абакаров, Сажид Загълиев, Арбули МахIаммадов, Исямуттин Абакаров, Владимир Анидзе, МахIаммад Мамедов, Дибир Дибиров, ХIажимурад МахIаммадов, Садуллагь Крымов, Тимур Шагьвердиев, МахIаммадшапи Аьвдулжалилов, МахIаммад Аммаев, Ольга Портнягина, ПатIимат Чурланова, Ольга Лебедева, Зумрут Сулайманова, Анатолий Карибов, Аьлибас ХIажиев ва м.ц.
Дагъусттаннай му ххуллийхсса суккушин дайдирхьуссар 1969-ку шинал, ДГУ-лул студентътал ЧIиркIайннал ГЭС буллалисса давурттайн лавгун бивкIсса чIумал.
Азарунния ливчусса жула студентътал лаглай бивкIссар Дагъусттаннал кьатIувгу – Амурдал областьрайсса Зейскаллал ГЭС-райн, Атоммашрайн, Архангельскаллал, Белгородрал, Тюменнал, Смоленскаллал обласирттайсса стройкарттайн.
Дагъусттаннал студентътурал кьюкьраву бивкIссар жула вузирдаву ккалаккисса дазул кьатIатусса студентъталгу – Вьетнамнавасса, Кубанавасса.
Шаназарахъул студентътал ва дуклаки оьрчIру гьарца шинах, сезондалул чIумал, лагайсса бивкIссар жулла республикалул вивсса давурттайнгу, консервалул заводру бусса Дарбантлив, Белиджилийн, Кьасумкантлив, Хасаврайн, Щурагьун, зунттавусса Ххажалмащилийн, ЦIахъарав, Щаржавуллайн, УнцIукIуллайн ва м.ц.
Хъинну асар хьунсса кумаг шайсса бивкIссар студентътурал чулуха лухIитIутIи батIайсса чIумалгу, 1-мур ва 5-мур курсирал студентътал личIаннин лагайсса бивкIссар гайми циняв.
Студентътурал стройотрядирттаву зий бивкIсса жула 63 студентнан СССР-данул Верховный Советрал Президиумрал дуллуссар орденну ва медаллу, ттуршунния ливчуссаннан дуллуссар ЦК ВЛКСМ-рал ва Дагъусттаннал обком комсомолданул хIурматрал грамотартту, 26 инсаннал ларсъссар ДАССР-нул Верховный Советрал Президиумрал цIаниясса хIурматрал грамотартту.
ДакIнийхтуну барча тIий ура та чIумалсса «захIматрал семестрдаву» гьуртту хьусса цинявннахьвагу комсомолданул 100 шинал юбилей! ЧIа тIий ура хIакьинусса студентътуран, жагьилтуран жула паччахIлугърал иширттавухсса ва давурттавухсса чялишсса гьурттушиву, ххисса романтика ва ххаллилсса дуккаву.
АьбдурахIман Адамов,
1980-1984 шиннардийсса
республикалул
студентътурал
стройотрядирттал командир
