Музыкантътурал юбилей

Октябрьданул 1-нний, щаллагу дунияллий кIицI лагайсса Музыкалул кьини МахIачкъалалив, Лакрал театрдануву, хьунни Дагъусттаннал Музыкантътурал союзран 60 шин шаврин хас дурсса шадлугърайсса батIаву.

Республикалул Музыкантътурал союзрал коллектив юбилейращал барча буллай, махъ лавхъунни ДР-лул культуралул министрнал хъиривчу Мурад ХIажиевлул. Цалва ихтилатраву мунал чIурчIав дунни Союзрал, мунил каялувчи Хан Башировлул дуллалисса даврил агьамшиврий, Дагъусттаннал композитортурал чивчусса произведенияртту машгьур бавриву бугьлагьисса кIанттуй.

ДР-лул культуралул министрнал буржру чIумуйну биттур буллали­сса Зарема Буттаевал цIаниясса Барчаллагьрал грамотартту дуллунни Хан Башировлун, Дагъусттаннал паччахIлугърал хорданул артистътуран ва Дагъусттаннал халкьуннал инструментирттал оркестрданул музыкантътуран.
Ва кьини Дагъусттаннал Музыкантътурал союзрал цIаний бувкIуна Музыкалул ишккаккулт­рал Дунияллул халкьуннал дянив­сса союзрал президент, АьФ-лул искусствалул лайкь хьусса иш­ккакку, профессор Андрей Соколовлул чулухасса барча буллалисса чагъаргу.

Муний кIицI лавгун бия Дагъусттаннал Музыкантътурал союз хIакьинусса кьини Ухссавнил Ккавкказнаву ца яла хьхьичIунмур душиву. КIицI ларгун дия Союзрал дуллалисса ихIсаниятрал давурттугу, миннувух – 1999-ку шинал респуб­ликалийн къачагътурал кьюкьри ххярхсса чIумал саллатIнал, ополчентурал хьхьичI ккаккан дуллай бивкIсса концертругу.

Барча буллалисса ихтилатирттал лях-карах МахIачкъала шагьрулул искусствалул школардал оьрчIал, Дагъусттаннал паччахIлугърал хорданул ва Халкьуннал инструментирттал оркестр­данул бавтIминнан пишкаш бувна музыкалул номерду.