Дуккавриву хъинну хIарачат бусса жула лакку душ Сабина Мусаевал Германнал Тюбингенскаллал университетраву сентябрьданул 17-нний бюхттулсса даражалийдурурччунни докторнал диссертация. Ва бур жуна чIявучин кIулсса КIямашрал шяраватусса профессор Идрис Мусаевлул душ.
Залму АьбдурахIманова
Ца-кIива махъ ва Европанаву ва мунил кьатIувгу цIа ларгсса дуккаврил идаралиягу. Тюбинген тIисса шагьрулийсса Эберхардлул ва Карлълул университет мадарасса тарих бусса паччахIлугърал сий дусса университет хъанахъиссар. Дунияллийх ванил цIа ларгун дуссар хъунмурчIин медициналул, жяматийсса ва естественнайсса элмурдаха зузисса университет хIисаврай.
ЛичIи-личIисса шиннардий Нобеллул премия ларсъсса ва Вуз къуртал бувссар урчIа инсаннал.
МахIачкъалалив бугу-бувну, хъунма хьусса Сабинал 2006 шинал мусил медальданущал «Гулливер» тIисса паччахIлугърал бакъасса школа къуртал бувссар. Школалий дуклакисса чIумалва ванил хъунмур гъира кьатIаллил мазру лахьхьаврих бивкIун бур.
Ингилис ва немец мазурдил олимпиадарттай хьхьичIунсса кIанттурдан лайкь хьуну бивкIун бур.
2009 шинал ва дуклай бивкIун бур Ганновердай Готфрид Лейбницлул цIанийсса университетраву магистратуралий. Мура шинал Сабина дуклангу бувххун бур Тюбингенскаллал университетрал аспирантуралийн. Шикку дуклакисса 7 шинайгу, Евросоюзравун духлахисса хIукуматирттал экономика, политика ва финансру ххал дигьлай, элмийсса хъиривлаявурттаха зий бивкIун бур. Микку дуклакиссаксса чIумул мутталийгу Сабина стажировкалийн кьамул бувну бивкIун бур Бундестагравун (Германнал Федерал собрание), Банкограйсса ООН-далул миссиялувун, Страсбурграйсса Европанал парламентравун.
Ванил цила докторнал диссертациялул даврил гьанулунгу ларсун диркIун дур Германнал ва Грециянал дянив хIасул хьуну диркIсса экономикалуцIун ва валюталуцIун дархIусса тагьар.
Тюбингенскаллал университетраву зузисса политиктурал ва экономистътурал лахъсса кьимат бивщуну бур Сабинал уттигъанну дурурччусса диссертациялун – ванин дуллуну дур докторнал цIа.
Сабина дакIнихтуну барчагу буллай, чIа учин ччай буру оьрмулуву тIайлабацIу, цIуллушиву ва элмулуха зунсса каши-кьудрат.
Аллагьнал кабакьиннав вицIун гихунмайгу!
