Сентябрь зурул 28-нний Москавлив, ПаччахIлугърал Машрикьуллал музейраву, Дагъусттаннал магьирлугъран хас дурсса выставка тIиртIунни.
П. Рамазанова
Ккаккиялун дирхьунни микку Дагъусттаннал лайкь хьусса художник Клара Власовал дирхьусса суратру, историк-искусствовед Раиса Исламовал каруннил щавшсса панно, «Дагъусттан» культуралул центрданул халкьуннал творчествалул ва канил давурттал ассоциациялул хъунмур, искусствовед ПатIимат ХIаммадовал коллекциялувасса миллатрал лаххия ва арцу-мусил чIюлушинна.
Клара Власовал бувсунни цуппа, дагъусттаннал художник Оьмар Ефимовлун щар хьуну, ччя-ччяни Дагъусттаннайн бучIайсса бивкIшиву, зунттал тIабиаьтрал ххуйшиврул хIайран бувну чIярусса суратру дуршиву ва сайки щалва оьрмугу Дагъусттаннал темалун хас бувшиву. Бувсунни чIяруссара суратру дирхьушиву ЧIухъив ва Гъумук яхъанай бивкIсса ппурттуву.
Выставкалул колорит ярг дуллай дур ПатIимат ХIаммадовал коллекциялувасса Дагъусттаннал миллатирттал лаххиялул ва 19-мур аьсрулул арцул чIюлушиннардал.
Тамаша бан бувкIми барча буллалисса ихтилат буллай, Аьрасатнал Президентнал Постпреднал маслихIатчи Ольга Портнягинал барчаллагь увкунни Машрикьуллал Музейрал зузалтрахь, Дагъусттаннал культуралух ва магьирлугърах къулагъас хIисаврайсса проектрахлу, Выставка дикIантIий дур октябрь зурул 14-ниннийн.
