Дагъусттаннал агьалинащалсса ирглийсса хьунабакьаву дунни Аьрасатнал ПаччахIлугърал Думалул депутат Аьвдулмажид МахIрамовлул.

Цалчин депутатнал кьамул увсса ТIиларатIиял райондалий­сса Хиндах тIисса шяраваллил бакIчи Катиев СултанмахIаммад увкIун ия шяраву мобил связь дакъа, жямат хъинну азурда хьуну бушиву бусан. МахIрамовлул ванал масъала анаварсса мутталий дузал баву тIалав буллали­сса аьрза тIайла бувккунни «Ростелеком» ПАО-лийн.

Хъирив депутатначIан бувкI­сса АхIмадова Жамиля бия ххуллул апатIрахьхьун биривну цалчинмур группалул мушакъат хьусса хъамитайпа. ЧIал къавхьуну ванин гьан багьлай бур Санкт-Петербургливсса клиникалий хъин хьун. Мунияту ва бувкIун бия ххуллухсса харж бишаврин кумаг бара тIий, миннат буллай. Депутатнал, хъамитайпалул захIматсса тагьаргу хIисавравун ларсун, цала кумагчинайн тапшур бунни ванин самолетрайнсса билетру машан ласун.

[dropcap]М[/dropcap]укунма депутатначIан аьрзирдай бувкIсса агьали бия цIуллу-сагъшиврул ссуссукьушиву дусса инсантуран уква булун ккаккан бувсса даруртту къабуллай бушиву бусласисса. Бабаюртуллал райондалиясса Надир Исмяилов ия хьхьичIавагу цанма багьлай бивкIсса дарур­тту Аьвдулмажид МахIрамовлул кумаграйхчIин лавсшиву буслай ва уттигу цанма багьайсса даруртту къабуллай дачIи шин ларгунни тIий.

Рая Дибирова аьрзирай бия дяъвилул иширттаву гьуртту хьуну, мушакъат хьусса ласнан багьайсса даруртту къабуллай бур тIий. МахIрамовлул вай масъалартту хъирив лавну, щаллу баву тIалав буллали­сса чагъар гьан бунни Республикалул ЦIуллу-сагъшиву дуруччаврил министр Жамалуттин ХIажиибрагьимовлуйн.
Мукунма ва кьини депутатна­чIан бувкIун бия футболданул майдандалул хIакъиравусса суд­рал хIукму биттур къабаврий рязи бакъасса агьали.
ЦачIанма бувкIсса агьалинал масъаларттал хIакъираву депутатнал ккавккунни маслихIатру ва тапшур бунни цала кумагчитурайн ми дузал баврил ялув бацIаву.