1813 шинал октябрь зурул 18-нний оьруснал аьралуннал ва миннал чул бувгьуминнал ххит бувссар Наполеоннул аьра­ллу Лейпциг шагьрулучIа хьусса Халкьуннал талатавриву.
Лейпциг шагьрулучIасса талатаву Наполеоннул дяъвирдаву ва дунияллул тарихраву ца яла хъуннамур ва гужмур талатавуну хьуссар.

***
1827 шинал октябрь зурул 20-нний оьруснал флотрал ва миннал сюзниктурал — ингилиснал ва палангнал аьралуннал Новориннал бухталий хьусса хьхьирил талатавриву ххит бувссар Турк­нал флот. Ванийну чIаланну хьхьара хьуссар Туркнал хьхьирил гужру.

***
1612 шинал ноябрь зурул 4-нний кIинияз Дмитрий Пожарскийл каялувшиндарай­сса халкьуннал ополчентурал тархъан бувссар Москав чил билаятирттал чапхунчитурая. МоскавуллачIан ополченцы гъан хъанахъишиву кIулну, поляктуран ччан бивкIссар цала пушкарду москавуллал халкьуннал шагьрулул чIирттайн гьаз буллали бан. Ми мютIи къашаву восстаниялийн кIура дарссар.

***
1943 шинал ноябрь зурул 6-нний совет аьралуннал тархъан бувссар Киев немецнал чапхунчитурая.

***
1941 шинал ноябрь зурул 7-нний ЯтIул майданнив Парад хьуссар. Дяъви байбишиннин­сса шиннардий Совет Союзрай ЯтIул майданнив мудангу лахъа-хъунну кIицI дайсса диркIссар Октябрь революциялул байран. Амма дяъви байбивхьусса шинал чIявуми, хаснува дазул кьатIаллил агьлу, бивкIссар байран къадансса ххай.
Амма парад дурссар. Му даврил хъуннасса мяънагу диркIссар. Му хьуссар дяъвилул шиннардийсса цалчинсса парад. Му дурссар Верховный Главнокомандующий И. Сталиннул амрулийну.

Парад дансса пикри най буна къавхьуссар. Москавуллал чIаравсса тагьар нигьачIисса диркIссар. Октябрь зурул 28-нний Сталиннул дурсса совещаниялий, Октябрь революция хьуну 24 шин шаврин хасну, шадлугърал мероприятияр­тту даврил хIакъиравусса ихтилат хьуссар. Миккува гьаз хьу­ссар парадрал масъалагу. Аьралунналгу, къинттуллухминналгу дакI дан парад дансса хIукму бувссар.

ХIадур бувссар
А. Аьбдуллаевал