Октябрьданул 11-нний Каспийскалий хIукуматрал ва муниципал хIаллихшиннардал центрдал щалагу Аьрасатнал форум хьунни.
З.АьбдурахIманова
Ваний гьуртту хьунни 500 инсан. Гьурттучитуравух, билаятрал регионнайсса МФЦ-рдал каялувчитал, пишакартал бакъасса, чил паччахIлугъирттаясса профильданул идарарттал вакилталгу бия.
Форумрай ххал бивгьусса агьамми суаллугу МФЦ-рдал аьмну дуллалисса давриясса, микку ишла дансса цIу-цIусса механизмардаясса, халкьуннан дигьалагрулун щурущи дувансса проектирдаясса бия.
Форумрал гьурттучитал жулла республикалул культуралущал, тIабиаьтращал кIул бансса мурадрай, сакин бувну бия жула миллатирттал касмурдал майданну щурущисса «Дагъусттаннал туризм» тIисса авадансса стенд.
Форум тIитIлатIисса шадлугърай гьуртту хьунни Дагъусттаннал премьер-министр Артем Здуновгу.
— ЧIявусса процессру анавар бувксса заманнай, билаятралгу цала агьалинан мюнпатсса, хайр бусса проектру щурущи дуллай бур. ХIакьинусса кьини МФЦ-рдай 400 хIаллихшинна халкьуннан дуллай буссар»,- увкунни А.Здуновлул.
Щала Аьрасатнал халкьуннал фронтрал централ штабрал вакил Виктор Климовлулгу кIицI лавгунни халкьуннал ва хIукуматрал дянив МФЦ-рдал хъуннасса даву дуллалишиву.
— Ххюра шинал хьхьичI жува тикрал буллай бивкIру МФЦ-рду хъинну тIайлабацIусса проект душиву. Халкьуннангу муниясса къулайшинна дурчIуну, ялу-ялун даврил ххуйсса даража тIалав буллай бур»,-увкунни ванал.
АьФ-лул Минкомсвязьрал министрнал хъиривчу Максим Паршиннул мукунма кIицI лавгунни билаятрай МФЦ-рду тIитIлатIисса даврил дайдихьулий цувагу гьурттуну ивкIшиву.
— ЦIана Аьрасатнаву 3 азарваксса МФЦ зий буссар. Ми тIитIаврийну 10 азараксса инсаннан зунсса кIанттурду хьуссар ва му системалул лагрулий гьантлун миллиондалийн бивсса халкьуннансса хIаллихшиннарду дувайссар.
Форумрал лагрулий хьунни чIявусса батIавуртту, «ккуркки столлу», проектирдал пленумру. Шикку мукунна билаятрай хьхьичIунну зузисса МФЦ-рдан ва миккусса пишfкартуран бахшишру дуллалисса шадлугъругу хьунни.
