Грипп – му дур, махъсса чIяруми инфекциярттаяр ляличIину, ларайсса контагиозность дусса, яни къашавайманая чIаравсса цаманайн лахъайсса цIуцIаву,
мунийн бувну чIявуну эпидемияртту шайсса.
Управлениялул зузалтрал бусласимунийн бувну, гриппрал ва ОРВИ-лул профилактикану, яни инсантал къашавай къахьунсса яла хъинмур чаранну, хъанай дур вакцинация. Цайми инфекциярттаясса иммунизациялия гриппралмур личIишиву му дур – ванилмур вакцинация гьарца шинал дуллан аьркиншиву.
Ларгсса шинал республикалул агьалинал 40 % дурну дур гриппраясса прививка. Му дурминнал дянив гужну къашавай хьусса къавхьуну бур.
Ва шинал уттинин Дагъусттаннайн «Совигрипп» вакциналул 225 азарва доза бувкIун бур.
Агьалинал иммунизация дуллалиссар федерал бюджетравасса арцух.
[dropcap]В[/dropcap]акцинация хьхьичIра-хьхьичI дуван аьркинссар гриппрал къашавай хьунсса хъуннасса нигьачIин думиннал: оьрмулул 6 зуруяр лавайсса оьрчIал, оьрмулул 60 шинаяр бугьарасса инсантурал, эндокрин системалул, оьтту щурущаврил системалул (гипертония, къюкIлил къашайшивуртту), ссихIирал ххуллурдал къашайшивуртту (хронический бронхит, бронхирдал астма), ччаруллал ва ттиликIрал хронический къашайшивуртту думиннал, лякьлуву оьрчI бусса хъаннил, чIявуну ОРВИ-рдал къашайшивурттал бугьлагьиминнал. Мукунма медициналул зузалтрал, кIулшиву дулаврил, агьалинансса хIаллихшиннарду щаллу даврил ва транспортрал идарарттай зузиминнал, аьралуннаву къуллугъ бан наниминнал.
Вакцинация дуллалиссар инсан цува ялапар хъанахъисса, дуклакисса ягу зузисса кIанттурдачIасса медициналул идарарттай.
