Гьашину гъинттул, хIачIайсса щинал ва хьхьирил щинал ялув бацIаву дуллай бунува, ДР-лул Роспотребнадзорданул управлениялул ялун личин бунни чIявусса законну лиян дур­сса ишру.

[dropcap]М[/dropcap]и циняв иширттал хIакъираву управлениялул баян бувссар МахIачкъалаллал администрациялийн. Миккун гьан бувну бивкIссар, «Махачкалаводоканалданул» «ДОСААФ» микрорайондалулгу, Красноармейскаллал поселокралгу, «Семендер» поселокралгу ялапартуран дуллалисса щин чапалсса дуну, хIачIан къадагъа дихьлахьишиврул хIакъиравусса хIукму. Цанчирча июнь-июль зурдардий тиккун нанисса щин чапал­сса диркIссар микробиологиялул ва органолептикалул ккаккияр­ттал чулуха.
Амма шагьрулул администрациялул чулуха цукунчIавсса жаваб дуркIун дакъар, мунияту материаллу тIайла дурккун диркIун дур дакьаврил судрайн.
Му бакъасса, управлениялул шагьрулул администрациялийн тIайла бувккун бивкIун бур «Ккаккан къабувсса кIанттурдай къалпузру ва къавунну бахлан къадагъа дишаврил хIакъираву» тIисса хIукму. Роспотребнадзорданул хъиривлаяврийну, къалпузру ва къавунну бахлай бур ччи-ччиний, ми чату бувкIссарив, миннуя нигьачIаву душиву ягу дакъашиву тасттикь буллалисса документру ба­къанма.
Мукунма Роспотребнадзорданул къадагъа дирхьуну диркIун дур хьхьирил щинавун къабучIлан, щин чапалну душиву сававну. Му мукуннугу, халкь хьхьирийн занай тIий, июльданий МахIачкъалалив ххюттуканил азардал къашавайсса гьарза хьуну бивкIун бур, дукIусса вара чIумух бурувгун.
Ми циняв иширттал хIа­къираву шагьрулул администрациялия жаваб дакъа духьувкун, Роспотребнадзорданул цила хIукмурду тIайла бувккун бур МахIачкъалаллал прокуратуралийн. Августрал 20-нний прокуратуралул шагьрулул администрациялун ккаккан бувну бур федерал законну лиян дуллалисса иширттал хьхьичIалу кьукьин.
ХIадур бувссар
ХI. Аьдиловлул