Лайкьссия ва Виричунал цIанингу

Сентябрь зурул 5-нний ЦIуминалийсса ТIюхчардал 1-мур школалий хьунни 1999 шиналсса дяъвилул иширттаву къучагъшиврий жан дуллусса АхIмад Давдиевлул мемориал ула тIитIлатIисса мажлис.

Андриана Аьбдуллаева
Шикку гьуртту хьунни ЦIу­ссалакрал райондалул администрациялул бакIчинал хъиривчу ХIажи ХIажиев, Каспийскаллал СаллатIнал ниттихъал комитетрал председатель Таиса МахIаммадова, Аьрасатнал Виричу Загьид Загьидов, Каспийск шагьрулул музейрал директор Нажмуттин ХIажикьурбанов, Каспийск шагьрулул ЦБС-рал директор Мадина Темирова, чичу ПатIимат Аледзиева, КIулшивуртту дулаврил управлениялул хъунаманан кIанайсса Расул Атлангереев, Къумтуркъалаллал РОВД-лул хъунаманан кIанайсса Жавраил Маммаев, ТIюхчардал шяраваллил администрациялул хъунама Аьли Аьлиев, АхIмадлущал къуллугъ буллай ивкIсса Ким Агъа­ев, АхIмадлул уссу Сайпуттин Давдиев, АхIмадлул ссурвал ва гъан-маччами.

Дуклаки оьрчIал увкунни А. Давдиевлул аьпалун хас бувсса балайрду, дурккунни назмурду.
Виричунал аьпалун минутI­райсса пахъ багьаву дурну махъ тIиртIунни школалул лажин чIирай цIакь дурсса мемориал ула, дирхьунни тIутIив. Дуклаки оьрчIал итабавкьунни гьаваллавун кIяласса шарду.
1999 шинал, ЦIуссалакрал райондалийн ярагъуннил балгусса террористал ххявхсса кьини, АхIмад Чачаннал дазуйсса ТIюхчардал блокпострай ивкIун ур. Террористурал цалчинсса рищавугу ми­ккур хьусса. ЧIирисса милицалтрал кьюкьлун 3 азарунния ливчусса боевиктуращал унгу-унгуну талан багьссар. Шяраваллил ялув махIлалия биту-ххитулул чIурду баллан бикIайхту, АхIмад кIиккун левчуну ур. ТIивтIусса, кIучI хьун­сса кIанттурду бакъасса авлахърай ва 100-хъул боевикнайн данди авцIуну ур.

— Ина бусурманчу ура, ярагъ щяв бивхьуну, канийн учIарча, жу вин цичIав къабанну, — тIий бивкIун бур кьянкьасса жагьилнал махIаттал бувсса боевиктал.
— ХIаписартал канийн къабу­чIайссар, — кьянкьану жаваб дуллуну дур АхIмадлул.
Ккулла-янсав бухлаганнин талай, цаппара къачагъталгу кьатI бувну, къачагътурал ккуллардал цувагу увтун ур. Ванан диркIссар дурагу 31 шин.
Аьпалул хьуну махъ АхIмад­лун дуллуссар Къучагъшиврул орден. Лайкьссия ва Виричунал цIанингу.