Сентябрь зурул 11-нний Виваллил иширттал министерствалул системалий миграциялул масъаларттаха зузиминнал пишалул байран хъанай дур. ВаницIун бавхIуну, МахIачкъалаливсса УВМ-рал къатраву Дагъусттаннал виваллил иширттал министр, полициялул генерал-лейтенант Аьвдурашид МахIаммадов хьунаавкьунни Миграциялул подразделениярттал зузалтращал. Вай подразделенияртту Виваллил иширттал министерствалул биялдарахьхьун буллуну гьашину кIира шин хъанахъиссар.
[dropcap]М[/dropcap]играциялул зузалтрал байран барча дан бувкIун бия зузалтращалсса давриха зузисса управлениялул хъунама, виваллил къуллугърал полковник Сахават Сахаватов, УВМ-рал хъунама МахIаммад МахIаммадов, Аьрасатнал Виричу Загьид Загьидов, Дагъусттаннал университетрал ректор, профессор Муртазяли Рабаданов.
Зузалт барча буллалисса ихтилат бувна Аьвдурашид МахIаммадовлул. Ванал кIицI лавгуна Миграциялул управлениялул хъуннасса хъар лархъун бушиву, кьатIаллил миграциялул ялув бацIаву бакъассагу, вайннан агьали сияхIрай бишаврил, гражданствалул, визарду дулаврил масъаларттахагу зун багьлай бушиву, управлениялул хIаллихшиннарду хIакьину гьарцагу инсаннан, жула билаятрайминнан дакъассагу, дазул кьатIатуминнангу аьркин дагьлай душиву.
Хъирив ихтилат бувсса Муртазяли Рабадановлул бувсунни цала УВМ-ращал цIакьсса дахIаву душиву, цала ВУЗ-раву чIявусса чил билаятирттал студентътал бушиву ва миннал масъалартту цала цачIуну щаллу байшиву. Ихтилатру къуртал хьуну махъ къуллугърал буржру дакI марцIну бартбигьлагьисса ва давриву ххуйсса ккаккияртту чIалачIи дурсса зузалтран дуллунни наградартту.
Ва кьини министрнал Аьрасатнал паспортру буллунни республикалий ялапар хъанахъисса чил билаятраясса 14 инсаннахьхьун. Ахирданий хъамаллуран ккаккан дунни управлениялул къатри ва шиккун бувкIсса чил билаятирттаясса инсантуран бигьа-рахIатшиву дан цIуну бувсса кафе.
