«Ттул Дагъусттан» конкурсрай ххувшаву ларсми

[dropcap]С[/dropcap]иражуттиннул арс Марис Илиясов, МахIачкъала шагьрулул Кировский райондалул депутатътурал мажлисрал председательнал хъиривчу, МахIачкъала шагьрулул депутатътурал корпусрал КIулшиврул, спортрал, туризмалул, культуралул ва жагьилтурал иширттал комитетрал председатель.
Увну ур Марис МахIачкъалалив 1973 шинал, Читтурдал шяравасса Сиражуттиннул ва ГьунчIукьатIрал шяравасса Марияннул кулпатраву. Къуртал бувну бур шагьрулул 17-мур школа. 1990-ку шинал увххун ур Дагъусттаннал паччахIлугърал политех институтравун, консерварттал промышленностьрал технологиярттал факультетрайн. 1995 шинал мугу къуртал бувну, заочнайну був­ккуну бур ДГУ-лул экономикалул факультет. 2000-ку шинал увххун ур Москавлив МИД-рал Дипломатиялул академиялувун.
Ми­ккува аспирантуралувунгу увххун ур, дурурччуну дур экономикалул элмурдал кандидатнал цIа. АцIнияхъайсса шиннардий зий ивкIур ур Аьра­сатнал Налогирттал Федерал къуллугърай, лайкь хьуну ур «Отличник Федеральной налоговой службы РФ» цIанин. Ванал бур ххаллилсса кулпат Шуаьна, 4 оьрчI.

---

[dropcap]К[/dropcap]ъуртал хьунни управлентурал «Ттул Дагъусттан» тIисса конкурс. Муний ххув хьунни 54 инсан, миннал 70 % бур дагъусттанлувтурал, миннавугу 10 инсан – лакрал миллатраясса. «Илчи» кказит, ва конкурсрай ххув хьусса ла­к­райн редакциялийн оьвкуну, гьарцаннащал бакIра-бакIрах хьунабакьинтIисса кьасттирай буссар. Ва даврил дайдихьу дуллай, вай гьантрай редакциялий уссия Марис Илиясов.

— Марис, му конкурсравух гьуртту хьунсса пикри найбунава хьунавкьай ягу махъ?
— Конкурсрая ттун интернетрава кIул хьуна. БакIрайва гьуртту хьунсса пикри бакъа­ссия, ттухьва нава уссияв даву дур, зий ура, аьркиншиву да­къарча тIий. Яла, пикри бувну, маслихIат ккав­ккун, гьур­тту хьунсса хIукму був­ссия. Ттун ччай бия ттувува­сса гуж ххал бигьин, ттулла хьхьичI нара экзамен дугьан.

— Буси му конкурсрая цахъи гьарта-гьарзану.
— Конкурсрайн документру буллуну бия 11 азара инсаннал – Аьрасатнал 85-гу региондалиясса дагъусттанлувтурал. Цалчинмур этапрая махъ минная ливчIуна 6 азаллий 500 инсан. Манзилданийсса (дистанциялийсса) тестирование дурну махъ ливчIуна 226 инсан.

— Манзилданийсса тестированиялий ци журалул давуртту, суаллу бия?
— Хъинну чIявусса суаллу ва бигарду бия. Миннувух бия логикалийн багьайсса, анаварну хIукму-пикри буван аьркинсса тагьарданухун агьувкун, инсан цукун къуццу тIий урив ххал буллалисса, математикалийн багьай­сса. Циняв заданияртту дия управленец ялун личин аврийн тIайла дурсса. Гьурттучи ци журалул пишакар, ци сянатрал заллу унугу (журналист, хIакин, математик) личIишиву дакъа, суаллу бия ца куццуйсса.
Муния махъ ливчIсса 226-гу инсан уххан увуна видеокамерардал балгусса къатлувун. Хасъсса пишакарталгу бия жул ялтту бук­лай, жухь ихтияр дакъая бакI чулухуннай дувансса, кувннахь кувн­нал ссихI дуккансса. Шикку тас­ттикь хьуна га манзилданиймур даву гьарцагу гьурттучинал цаллалу дурссарив, юхссагу чIарах кумаг бувултгу бивкIссарив. Муния махъ 226 инсанная 161 инсан ливчIуна.
Конкурсрал давуртту дия, хъинну бигьассаннуя дайдирхьуну, лапра захIматссаннуйн дияннинсса, ялун бурган бакIрайра цал-цал бигьану чIаларчагу, хъинну куртIсса мяъна-мурад бусса.
Финалистътураву оьрмулул яла жагьилманан дур 22 шин, яла хъунаманан – 54.

— Зул ялув бавцIусса пишакартураву бияв Да­гъусттаннаяссагу?
— Цаягу дагъусттанлув ­акъая, жун ми, миннан жу къакIула, хIатта жула шихасса цучIавгума минначIан гъан хьун къаитайва. Миннан гьарцагу гьурттучи хъазамравун лархсса бейджикирттай чирчусса цIардайну акъа кIулнугу акъая. Ми жул ялув личIлулну бавцIуну бия, гьарцаннал увку­сса калималия, дурсса даврия махъ цачIара чичрурду дуллай бия.[pullquote]- Конкурсрая бунавхьур ихтилат, мюрщину бунава оьрчIаву итххяххан дуллалияра, хьхьичIуннай дуллалияра лидернал хасият. Тарбия буллалияра оьрчIру, жагьилтал цала хьхьичI мурад­ру бихьлай, ми щаллу буллали буллай.[/pullquote][dropcap]М[/dropcap]и гьантрай жущал хьунаавкьуна Республикалул БакIчинал буржру биттур буллалисса Владимир Васильев, вай гьантрай республикалийн Аьрасатнава бувкIсса лавайсса къуллугъчитал, жулла рес­публикалул хIукуматрал члентал, ххув хьуминнан миннал буллунни кубокру, дипломру, украсса ду­ккавринсса сертификатру (семинардайнсса). Цал­ссарив, ва зуруй Владивостокрай хьунтIисса, Владимир Путиннуя, Сергей Кириенкоя тIайла хьуну, билаятрал хьхьичIунсса инсанталгу гьуртту­сса форумрайн финалистътуравасса шама гьантIиссар, миннавух, ттун кIулссаксса, ва конкурсрай ххув хьусса лакку душ, клиникалул ординатурардал хIакин Тамара Сулаймановагу.
Лавайсса даражалий ва хъинну хъунмасса харжгу буккан бувну дурсса даву дия ва конкурс.

— Конкурсрал гьурттучитураву винма муниннин кIулну бивкIсса инсанталгу бияв?
— Бия мукунссагу, шагьрулул администрациялий зузи­сса жагьилтал тIий, цайми тIий, 5 инсан.
— Ва конкурсрал вин ци дуллур, муния махъ ци пик­ри бав?
— Цалчин, ттул дакI дарцIунни му конкурсрал тIайлашиврий, оьрус­рай учай, «прозрачность» куну. КIилчин, ттун кIул хьунни цIу-цIусса хъин-хъинсса инсантал. На уттинин цукунчIавсса конкурсирттавух гьуртту хьусса инсан акъа­яв, бувчIунни ттущавагу бю­хъайшиву ми духIан.
— «Лидер России» конкурсравух гьуртту хьун­сса пикригу бурив?
— Бакъар. Цал гьуртту хьурав, гьассар, акъарив так гьуртту хьуншиврул дуллалисса даву кунна чIалантIиссар. Му конкурсрайгу сайки вайра заданиярттур ду­ссагу. Уттинин Москавлий дакъа къадурну диркIсса конкурс, Аьра­сатнал регионнаву хьхьичIра-хьхьичI Дагъусттаннай дунни, на муний ххув хьура, гьар ттун мугу, гьар му ттул тухумрал тарихрангу.

— Вил хасиятраву ххишаламур бутIа буттаясса буривкьай ягу, аьпа биву, ниттиясса бурив?
— Дурусну – бачIи буттая, бачIи ниттия.

— Лакку маз кIулшиврул бияла щия нанисса бур?
— Лакку мазрая тIурчаннив, нину-ппу оьрчIниява ичIува жущал лакку мазрай гъалгъа тIий бикIайва. Школалий дуклакисса шиннардийгу буттал ниттичIан, буттал буттачIан Читтурав лагай­ссияв. Ниттил ниттин Мухлисатлун оьрус маз сайки къакIула, мунищал лакку мазрай гъалгъа тIийгу ххуй­сса практика шайва.

— Лакрал жагьилтурахь, кказитрал буккултрахь ци учин бюхъанссар?
— Конкурсрая бунавхьур ихтилат, мюрщину бунава оьрчIаву итххяххан дуллалияра, хьхьичIуннай дуллалияра лидернал хасият. Тарбия буллалияра оьрчIру, жагьилтал цала хьхьичI мурадру бихьлай, ми щаллу буллали буллай. Чара бакъа ци-дунугу хъуннасса даву дуван къааьркинссар – дуниял кIура даен дуван ягу аьламравун леххан. Гьарца кьини дуллалисса давур­ттаву цаятурасса тIалавшинна ларай дуллан аьркинссар, дуклан, кIулшивуртту цалнияр цал куртI дуллан.
Укунсса тIалавшин дуссар ттулами оьрчIаягу.

— Марис, цал уттигу барча дуллай буру вил хъуннасса ххувшаву, вил оьр­мулуву ванияр тинмайми тIайлабацIуртту хъиннува чIяву хьуннав, ина кунмасса, итххявхсса оьрчIру лакрал миллатрал дянив чIяву баннав.

Ихтилат бувссар
Р. Башаевлул
Чивчуссар
Бадрижамал Аьлиевал