[dropcap]М[/dropcap]оскавлив дуклакисса чIумал, на чIявуну лагайссияв дяъвилул шиннардий УзбакIнаву Каганнай эвакуациялий ивкIсса, ттучIара адресгу кьадиртун диркIсса, Менахем ИлканаевлучIан. Му ччяния шинайва зий ивкIун ия хъинну багьлул лавайсса халичарттал реставраторну.

---

Ца ххуллух, нава каникуллай Каганнайн нанисса чIумал, мунал ттухьхьун тIайла бувккуна чIивисса чумадан, ганиву дия реставратортурал цалла даврин ишла дайсса личIи-личIисса рангру (краскартту), Каганнай луттирдал ттучандалий зузисса цала гьалмахчуна­хьхьун дула кусса. КIулсса инсаннайхчин лавсун бивкIсса поездрал билетгу бия ттухь Ташкантлив бияннинсса. Вагондалува ув­ккун нанисса ппурттуву хьулух бавцIусса милицалтрал личIи буллай ва ххал буллай бия цайми кIанттурдаяту бувкIми пассажиртал. Увцуну милицанал отделениялийн, ттухь тIитIа кунни чумадан.

[dropcap]Н[/dropcap]а учав: «Ва ттул чумадан бакъар, ва на, ца хъамитайпалул тавакъюрайн бувну, кьатIув буккан бан лавсун най уссияв», — куну. Милицалт ттущал архIал кьатIув бувккун, ххал буллан бивкIуна на тIисса хъамитайпа. Амма, ча лякъинссия, къалявкъуна бакъасса хъамитайпа. Гайннал гьаксса хIарачат бувна на чумадан ттула бушиврий мукIру хьун уллай, амма на нетI бувгьуну авцIура, му ттул ба­къар, нава кумаг буллай ивкIсса хъамитайпалулли тIий. Итаакьиннин гайннал яла ца цамургу хIарачат бувна, ттуяту цала инсан хьун уван, яни «стукачнал» пишалул инсанну зузи ан, амма на цукунчIав рязи къавхьуссияв.

Мукуна, мира каникуллу хIа­ласса ца цамур чIумалгу, ттула бу­ттал дуссукъатлувусса усттартурал ттухь тавакъю бувна, Ташккантлив лавгун, пулансса кIанттаяту къалай машан ларсун учIан. Къалайгу ларсун, вокзалданийн нанисса ххуллий, ацIан увну милицанал, увцуну отделениялийн, цIухла бивхьуну, ляркъуна къалай. Тти дакIний бакъар цукуннив, амма га базилухгу цукун-унугу ххассал хьуну увкIссияв. Муния махъ ттун ккав­ккун ччан къабикIайва Ташкант тIисса шагьру.
Институтраву на ласайссия 26 къуруш стипендиялул, мунийн бувну, ссаха-унугу зий, хьун дан багьайва ттуннасса чIарахсса арцу.

Алексей Карелин тIисса ттула ца гьалмахчунащал архIал на чIявуну лагайссияв Москавуллал областьрайсса Тучкова тIисса шагьрулийн. Муния арх бакъа бикIайва ххалаххив бай­сса, та чIумал ца бакъа бакъа­сса, фабрика. Рирщуну гикку суратругу, яла дуккангу дурну, хъиривмур бигьалагай кьини ларсун учIайссияв гиккуна. Мукун лякъайссия ттунмасса шагьи. Мичча айивхьуну, кIул буллай, хъирив лаллай, ккалай, на хъинну ххуйну лархьхьу­ссия суратрищул сянат. Суратру дакъа­ссагу, дувайссия архитектуралул искусствалуцIун дархIусса открыткарттугу. Яла ми даххай­ссия къурушран цану. Ча, миннул кумаграйну ттуща бювхъуна кIива оьрчI бусса ттула кулпат ябан.
1954-ку шинал на ивтунав Бухарная зувира ккиламетIралул манзилданийсса Вабккантуллал райондалул хъунама ветврачну. Вабккантуллал цIа дунияллийх машгьур­ссия, тикку 900 шинал хьхьичI був­сса, бусурманнал дунияллий ца яла исвагьимунин ккалли байсса минара бусса кIантту хIисаврай. Ваца лякьлуву оьрчI бусса хъамитайпа кунма чIалачIисса Бахардалмур минаралуха къалавхьхьуну, Вабккантуллалмур минара бу­ссар исвагьисса бюхттулсса душниха лавхьхьуну чIалачIисса. Дуниял сукку хьуну, лагма-ялттусса минарарду кув левкьун, кувгу хъяхъа кусса чIумал, Вабккантуллалмур минара, ца-кIилва хъюлчугу куну, кIа бусса куццуй бавцIуну ливчIссар.

[dropcap]М[/dropcap]инарардая ихтилат багьну махъ, ца укунсса затгу кIицI къабувну кьабитан къахьун­ссар. Жула МахIачкъалалив бувну бацIан був­сса Хъун мизит бур жула Дагъусттаннай аьдатравун багьну бивкIсса журалуха къалавхьхьусса – туркналмур журалийсса. Дагъусттаннал щархъавусса минарарду цинявппагу лавхьхьусса буссар Бухарнавусса минарардаха.
На Вабккантлив зун ивкIсса ппурттуву колхозирттал ва сов­хозирттал, налогру дихьлай був­ккун буну тIий, хъинну чан бувну бия ишла буллалисса ттук­ри. ХIатта ми кьабивтунгума бикIайва, заллу-зал акъа. Ахиргу, Бухарнавун давурттай зун булгъарнал агьлу бувкIсса шиннардий ттукри сайки циняв бухвалавгуна: ххал дарча, Булгарнаву ва Венгриянаву тту­ккул дикI деликатесну хIисав дай­сса диркIун дия.

1954-кусса шинал, Вабккантлив зун увкIсса чIумал, ххюра-ряхра райондалул хъуниминнал на увцунав цащала архIал Сталиннул цIанийсса колхозрал председатель, Лениннул ордендалул лауреат БабакуловлучIан. МуначIан чара бакъа ияйссар тIун бикIайва тани­сса респуб­ликалул каялувчи Юсуповгу. БувкIун, тIивтIуну ссупрагу, председательнал хIаятравусса багъраву щябивкIсса чIумал, лавсун бувкIун, столданул чIарав бивхьуна аьракьилул ящикI. Мажлис дахьа байбивхьусса ппурттуву, щаллусса аьракьилул шуша дуртIусса кIичIугу тту­хьхьун буллуну, хIачIан аьркин­ссар куна. Мукунма бувцIусса кIичIурдугу бувгьуну, бавцIуну бия гаймигу. Циняв ялугьлай бия на хIачIаннин. На, дахьасса ххувгу увкуну, махъунмай кIичIу бишин авчукун, къаивтунав. БувчIин бувна, на къахIавчIун, гайминналгу хIачIантIий бакъашиву. Цибанссия, ца ттулашиврий циняв мукун личIан къабитаншиврул, хIавчIссия дачIрасса ххюттуйн щалва кIичIу. ДакIний бия, мажлис байливтIуну махъ, гичча нава увксса, гания махъмур тIурча, дакIний бакъая цуппа ца зат. Шания ивзссияв хъиривмур кьини ахттайнай. Бусурман мухлукьатрал республикар тIисса УзбакIисттаннай хъунна­сса къучагъшиврун ккалли бай­сса бия, цал гьаз бувну, кIичIу аьракьилул хIачIаву. ХъатIай бивхьусса яшикIирттал ккалданийну хIисавгу дайсса дия хъатIул хъуншиврул барашин.

Вабккантлив ттучIан чIумуя чIумуйн бучIайва Москавлия­сса ттула дустал. Махъунмай нанийни, гайннал цащала лавсунгу лагайссия на ттула каруннах бувсса бюстру. На ми бувай­ссия Вабккантливсса ттула гьалмахтурангу.
Циваннив гъира багьну, на айивхьуссияв найрду буллайгу. Мунил хIакъиравусса чIярусса чичрурдугу ккалай, хъирив лаллай, ахиргу, на хьун бувссия шанма-мукьва кулпат ца къуршилуву яхъа­нахъисса най. Гьарцанния ласай­ссия ницIгу. Ми мукун хьуншиврул на ишла байссия уникалнайсса комбинацияртту, ца ттунма бакъа къакIулсса. Му ттула ххаллил­сса касмугу кьадиртссия яла, паммалул плантациярттал ялтту самолетирттал кашилийну дарур­тту, химикатру бичлан бивкIун махъ, мукунсса паммалул тIутIая найрдал ласласисса ницIгу цукунсса хъанантIиссарив чIалай.

Къатри дуллалаву, ваца сийлун кунна, гужлан хьусса чIумал, ттувунгу дагьуна му чулухуннайсса шавкь. Ялапаршиндаран аьркиншингу дакъанура (ттул бия нава яхъанахъисса квартира), ларсун чIаравра ца аьрщарал участокгу, айивхьуссияв дуллай къатри, ттула бакIраву нара салкьи дурсса проектрай: чантI увкуну бия ттуву архитектуралул чулухунмайсса ляличIиссава гъира. Сайки наралу дурну, дацIангу дурссия на, (щар­ссанилгу, ниттилгу кумаграцIух), ччинал дахIалай чинсса къатри. Архитектурагу бучIиссар лащан дан мува музыкалуха – ябивтукун, дакIницIух лавай симфония экьинан бикIайсса.

Хъиривгу буссар
Жаруллагь Керимов