Гьарца чулуха итххявхсса, шавхьсса, мяърипат дусса инсантал хьуншиврул оьрчIан так кIулшивуртту дуллалаву къагьассар. Тарбиялул даврихгу дагьайкунсса къулагъас дикIан аьркинссар. Ватан, буттал кIану ххирану тарбия баврил ца кьяйдалун ккалли буллай бур Шушиннал школалул учительница ПатIимат МахIрамова улча лахьхьаврихун машхул шаву. Ва Дагъусттаннал тарих ххуйну кIулсса, цIу-цIусса затру кIул буван гъирасса бур.
П. Рамазанова
[dropcap]П[/dropcap]ахрулий кIицI лаглай бур ва махъсса 9 шинал лажиндарай жура-журасса конкурсирттай хьхьичIунсса кIанттурду бувгьусса цила учениктал-краеведтал: Аьрасатнал Президентнал Грант ларсъсса Мусаева Аида, мукунма хьхьичIун ливчусса Яганов МахIаммад, Шагьмарданова Альбина. Султанова Камилал, 2016-2017 шинал республикалул лагрулийсса краеведениялул конкурсирттай гьуртту хьуну, 1-мур, 2-мур даражалул дипломру лавсун бур. Мукьра конкурсрай гьуртту хьуну, мукьунниявагу дипломирттащал зана хьуну бур.
ПатIимат МахIрамова бур архиврал документирттащал зунсса сант дагьминнай мяш хъанан бикIайссияв. ХIакьину мукунсса сант ПатIиматлухь цихьрагу дур: махъсса шиннардий ва зий бур Дагъусттаннал паччахIлугърал централ архивраву. «Руновскийл дневникравасса чичрурду», «Къизлардал комендант» ва цаймигу подлинникру лахьлай бур. Архиврал дуниял ххилтIу дуллай, цинма гъира бумуниха зий бур. Ванил мурадру, хияллу чIявур. Ххарину бур гьашину Санкт-Петербургливсса «кунсткамера» ккаккансса сант дагьлай душиврия.
КъакIулминнахьгу бусан, «кунсткамера» Санкт-Петербургливсса антропологиялул ва этнографиялул музейри. Аьрасатнавусса цалчинсса музейри, император Петр Великийл хIасул бувсса, Аьрасатнал элмурдал академиялул биялдарайсса цуппагу, кутIану МАЭ РАН.
ПатIимат МахIрамован чIа тIий буру уттиния тихуннайгу дуллалимуниву тIайлабацIу.
