Ца миграциялул центр уттигу

Каспийскалий шадлугърал даражалий тIивтIунни Миграциялул масъалартту щаллу буллансса центр. Шикку гьуртту хьунни ДР-лул виваллил иширттал министр, полициялул генерал-лейтенант Аьвдурашид МахIаммадов ва Миграциялул масъаларттаха зузисса управлениялул хъунама (УВМ) МахIаммад МахIаммадов. Вайннал ххал бунни агьалинан паччахIлугърал хIаллихшиннарду дайсса – зунсса патент, зунсса ихтияр, чIумуй яхьунсса квота ва м.ц. ласайсса къатри.


[dropcap]О[/dropcap]тделданул зузалтращалсса ихтилатраву министрнал кIицI ларгунни ва даврил агьамшиву ва зузалтрал хIарачат бан аьркиншиву агьалинал масъала ччясса чIумул мутталий щаллу бан. Министрнал бувсунни шикку зун, чил билаятирттая­сса инсантуращал ихтилат бан бю­хъайсса, Дагъусттаннал ВУЗ-рдал хьхьичIунсса выпускниктал бувцушиву.
Миграциялул центрданий зий бур хасъсса медициналул комиссия. ХIакинтурал ххал буллай бур шиккун бувкIми гьарца чулуха.

Медициналул комиссия бувну махъ дулун аьркинну дур ­оьрус маз, тарих ва правовой гьанурду кIулшиврул экзамен. Тестру дуллантIий бур хасъсса, компьютердал дузалсса классир­ттаву. МукьцIалла минутIрал дянив 20 суалданунсса жавабру чичин аьркинну дур. Миннува дачIи дунугу жавабру тIайласса дикIан аьркинну дур.

Центрданий ца гьантлул дянив 500 инсан кьамул ан бюхълай бур. ЦукунчIавсса учирду дикIан къааьркинссар.
Шиккун бувкIсса агьалинал масъалартту щаллу бан кIи­ра ссят­раяр ххишала къагьан­тIиссар. Муниннин документру ххал бантIиссар кIира нюжмардул дянив. Яла патент хIадур­шиву баян бантIиссар мигрантнан телефондалувух.
Андриана Аьбдуллаева