Уттигъанну къуртал хьунни Ухссавнил Ккавкказуллал жагьилтурал «Машук – 2018» тIисса форум. ХIакьину жу хьунабакьлай буру му форумравух гьуртту хьусса, микку Аьрасатнал Президент Владимир Путиннущал хьунаавкьусса лакку оьрчI Рамазанов Ися ХIабибуллагьлул арснащал.
Бадрижамал Аьлиева
Увну ур Ися Хъусращиял шяраву ХIабибуллагьлул ва Назирал кулпатраву 1991 шинал. Ванан 5-6 шин хьуния шинмай вайннал кулпат ялапар хъанай бур МахIачкъалалив. Исял ппу ХIабибуллагь зий ур Аскерхановлул цIанийсса Медициналул центрданий. ХьхьичIва машлул аралуву зий бивкIсса Назирал циламур оьрму хас бувну бур ца акъа акъасса арснан тарбия дулаврин.
Исял къуртал бувну бур МахIачкъалаллал шагьрулул 7-мур школа. Бувккуну бур Автомобиллал ххуллурдал университет, мунищала архIал, заочнайну дуклай, Финансирттал ва правалул институтгу.
Цалчинмур курсирай унава Ися агьну ур жяматийсса давурттахун. Цалла сакин дурну волонтертурал кьюкьа, мунил каялувчинугу ивкIун ур 5-6 шинай. Сочилий 2014 шинал хьусса Олимпий тIуркIурдайн Дагъусттанная язи увгьусса 30 инсаннавух 20 инсан ивкIун ур Исял сакин дурсса волонтертурал кьюкьлувасса. Муния махъ Паралимпий тIуркIурдайнгу тIайла увккун ур 30 волонтер. Оьрмулул 21 шинавусса Ися (цIана Исян дур 27 шин, ва ххуллух цува увсса кьини Исял хьунадаркьуну дур «Машук» форумрай) волонтертурал группалул каялувчи хIисаврай Олимпий тIуркIурдавух гьуртту шаву – му цала чIавасса оьрмулий ванал дурсса хъуннасса ккаккияр.
Мукьулчинмур курсирай Ися лайкь хьуну ур Дагъусттан Республикалул Президентнал чулухасса Барчаллагьран. Му чIумалнин Исял каялувшиндаралусса кьюкьлул ккал 20-нния 150-ннийн лархъун дур.
Ххюлчинмур курсирай дуклакисса чIумал Исяйн оьвкуну бур шагьрулул администрациялучIасса Спортрал, туризмалул ва жагьилтурал иширтталсса байсса комитетрачIасса Шагьрулул жагьилтурал центрданий зун, ванал бюхъугу, зузавугу чIалай. 2013 шинал къуртал бувну бур кIивагу ВУЗ, ламурдал ва транспортрал тоннельлал инженер-проектировщикнал ва юристнал дипломру бувгьуну бур кIунттил (шамилчинсса ларайсса кIулшиву ларсун, махъ, 2017 шинал, Исял кIунттил бувгьуну бур экономистналмур дипломгу).
Канихь вай пишарду бунугу, волонтерналмур даву диркIун дур Исял дакIнил ларсъсса, мунияту ва му Центрданийва авцIуну ур зун. Цаппара хIаллавун ва ивтун ур Шагьрулул жагьилтурал центрданул директорнал хъиривчуну. ЦIанагу му къуллугърай зий ур Ися. Вай чIяру дакъасса шиннардил мутталий дурну дур хъинну чIярусса давуртту. Ися ур Волонтертурал корпусрал каялувчинугу.
КIилчинсса шин хъанай дур Ися «МарцIсса тIуркIурду» («Чистые игры») тIисса цIанилусса щалагу Аьрасатнал экологиялул проектрал координаторну. Ва дур бяст-ччаллий цIинцI-ччюрк датIаврил проект, цилгу най бунува кIива агьамсса мурад щаллу буллалисса: цIанасса чIумал вацIлул дязаннивгу, хьхьирил, неххал щинавугу, зуманивгу, инсаннал ша бизайсса гьарцагу кIанттайгу дусса ччюрк датIаву, мигу, укунна датIаву дакъарча, най дунара сортирдайх дарчIуну датIаву, гихуннай цIунилгу мюнпат буну ишла дуваншиврул. Хасну ва проектрал презентацияр Исял уттигъанну хьусса «Машук» форумрай Аьрасатнал Президент Владимир Путиннул хьхьичI дурсса.
— Форумрай бия «Экологиялул жегъирххуллу» (Экотропа). Муний гьарцагу региондалул цалва улклуй щаллу дуллалисса яла яргмур, яла хьхьичIунмур проект ккаккан дурну дия. Дагъусттаннай щаллу дуллалисса «МарцIсса Каспий» тIисса цIанилусса проект ккаккан дував нагу микку.
Сакиншинначитуран даши дирзуна му ва билаятрал бакIчинал хьхьичI мунил презентация дувангу лайкьну ккавккуна. Ва проектрал хъун бакъасса тарих укунссар: Питердайсса жул дустуран, цивппа чуврив бигьалаглай бунува, муниннин микку бигьалаглай бивкIминнал цалла хъирив кьадиртсса ччюрк ккарккун, пикри хьуну ми дукьан, амма ми укунна дукьлакьаву бизарсса иширан ккалли бувну, пикри бувну бия му даву бяст-ччаллил, тIуркIулул журалий дуван, командарттугу сакин дурну. Чан-чанну тIий най, ялу-ялун хъунисса кIанттурду лакьлай, чIявусса инсантал хIала буллай бавчуну бур ми. На миннащал кIул хьура 2016 шинал. Му давривух цIанасса чIумал хIалану бур Аьрасатнал 10 шагьру, миннавух МахIачкъалагу, Ухссавнил Ккавкказуллал регионнаву – цалсса Дагъусттан ва Ставрополлал край, — буслай ур Ися.
Дагъусттаннай ва даву цалчин дуллан ивкIун ур Ися. Жагьилтурал центрданий зий, хъунисса дахIавуртту дусса, даву кIулсса Исяща, спонсорталгу лявкъуну, ва даву дюхъ дуну, усттарну дачин дуван бювхъуну бур.
Исял бусаврийн бувну, ччюрк най дунара тIайлану датIавриву яла хьхьичIунмур билаятну бур Япония, багьайкун личIи къадурну, ччюрк хIала-ккалану дартIнай аьчIагума дишайсса дур. Японнал хъирив лаян къабюхъарчагу, умуд бур Ися кунмасса жагьилтурал кумаграйну жулла республика экологиялул балаллуща ххассал дуван бюхъанссар, жула инсантураву, ахиргу, экологиялул культуралул гьану бизан бюхъанссар тIисса.
Исял бусаврийн бувну, яла бигьану гихуннай ишла дуван бюхъайсса материалну дусса дур шушри ва миннул чIутIри бувсса пластик, дарцIан дурну, миннуя ччимур дуван шайсса дур. Яла мюнпат бакъамур пластик дусса дур кьуцуртту баймур пластик.
«Машук» форумрай ва проектрая кIул хьусса оьрчIавугу цала-цала региондалий ва давриха зунсса гъира чантI увкуну бур. Форумрал хIасиллу уттигу къадунни, агарда ва проект грантран лайкь хьурча, ванил дазурду хъиннура гьарта-гьарза дувансса каширду ххи хьунссия.
Ися гьуртту хьусса хъунисса иширттавух дур 2017 шинал Сочилий хьусса, 30 азара инсан гьурттусса, щаллагу Дунияллул жагьилтурал ва студентътурал фестивальгу.
Ися цала оьрмулул 17 шинаву гьуртту хьуну ур билаятрай язимунин ккаллисса «Селигер» форумрай, микку цалчин ккавккун ур ванан билаятрал бакIчи В. Путин, мукуна премьер-министр Д. Медведевгу. Муния махъ Исян «Машук» форумрайгу (ванивух ва цимилагу гьуртту хьуну ур) ккавккун ур Д. Медведев. Билаятрал бакIчинащалсса кIилчинсса хьунаакьаву хьуну дур Сочилиймур фестивальданий. Владимир Путиннущалсса цалчинсса яхши-хашрив хьуну бур ва ххуллухмур «Машукрай».
— Владимир Путиннуяр хьхьичI жу СКФО-лул сайки циняв регионнал бакIчитуращал хьунабавкьуссияв, мукунма билаятрал хьхьичIунсса цаймигу къуллугъчитуращал, Сергей Кириенкоя тIайла хьуну. Яла увкIуна Владимир Путин. «Экотропалийсса» проектрал презентация цалчин дуван багьлай бия Дагъусттаннан, мукун президент цалчина-цалчин ттучIан гъан хьуна. Вас-ццах, гьалакшиву дурагу дакъагу акъассияв, тIайламур бусан, билаятрал цалчинсса инсаннащал ихтилат буван аьркиншиву кIулну. Амма ттунна ххуйну кIулсса проектрая бусав, личIисса аварашинна дакъа. Бусав му проект зун диркIния махъ щалагу Аьрасатнаву дартIшиву 400 тонналия (миннува Дагъусттаннай – 14 тонна) лирчусса ччюрк, миннуватугу дачIи цIунил ишла дуван тIайла дуркшиву. Микку билаятрал бакIчинал, цала зумуну хъярчгу бувну, Дунияллул футболданул чемпионатрай японнал цала хъирив стадиондалий ччюрк дуркьунахха, му даву миннал зуяту эбрат ларсун дурхьунссар куна…
ЦIана зумардай дуллалисса «МарцIсса тIуркIурду» тIисса проект щалла Дагъусттаннай – кьанивгу, зунттавугу, щаллу дуллансса пикри бур Исян ва ванал уртакьтуран.
Вай циняв давурттал ялун, ИсяцIун дархIусса дакI ххари дуллалисса тIитIалану хьунни ванан марцIну ниттил маз кIулшиву, буттал шяравун занан ххирашиву. Му ччавугу ванаву дирхьуну дур нитти-буттал, мудан ичIува цала арснащал лакку мазрай ихтилат буллалисса, бигьалаган ччинийн гьан бюхълай буна, шайсса гьарцагу гьантта буттал шяраву гьан буллалисса, «вари жул Турциягу, Италиягу» тIий.
Школалий дуклакисса чIумал, Исял ниттил мазрал олимпиадарттай шагьрулул лагрулий хьхьичIунсса кIанттурду бугьайсса бивкIун бур. Багьу-бизулул лагрулий ихтилат буванну ингилис мазгу кIулли Исян.
Уттинин Исял ларсъсса бахшиширттал кьуцури биялну кIусса бур: миву дур республикалул цIанасса бакIчи В. Васильевлул цIаниясса, шагьрулул каялувшиндарал чулухасса наградартту, цIа кусса ссят ва м.ц.. Амма ванансса яла хъуннамур бахшиш дур цурда даву, дакIнил ларсъсса, гъирарай дуллалисса.
ТIайлабацIу буваннав вин, Ися, гьарцагу дуллалимуниву! Ина кунмасса арсурваврал кIунттихьри бусса миллатралгу, республикалулгу, билаятралгу ялун бучIантIимур.
