1945-ку шинал Хъун дяъвилий бух хьушиврийсса чагъарданий Германнал къулбас дайхту, СССР хIукуматрайн къаршину ярагъ тIайла бувсса хIукуматну лирчIун диркIссар Японнал хIукумат.
[dropcap]М[/dropcap]унийн бувну 1945-ку шинал август зурул 8-нний хьхьувай СССР-данул аьрал бавчуссар Японнал аьралуннайн гьужум бувну. Августрал 10-нний жула аьралуннацIун кабакьу буллан бивссар Монгъулнал аьралгу. Японнал аьралуннайн къаршисса шанна фронт диркIссар: Забайкальский, кIира Дальневосточный. Вай фронтирттай каялувшиву дуллай бивкIссар: маршал Р. Я. Малиновский, маршал К. А. Мерецков, генерал М.А. Пуркаев. Аьмсса каялувшиву дуллай ивкIссар маршал А. М. Василевский. Вайннайн къаршину бивкIссар 1 миллион саллатI бусса Квантуллал армия. ХIасил, Японнал аьрал бух хьуссар.
Сентябрьданул 2-нний бух хьушиврийсса къулбас дурссар Японнал. Ва Ххувшаву ласаврин хас дурсса кьинину хъанахъиссар сентябрьданул 2-мур кьини.
Сентябрь зурул 3-нний Ккуллал райондалий Ваччав хьунни ххувшаврил рангирал лентарду бахIлахIисса кьини. Ва акциялул сиптачину ия райондалул администрациялул вивсса политикалул каялувчи Шамххал Хизриев. Ванан кумаг буллай бия райондалул «Жагьилтурал центрданул» директор ХIусбанов МахIаммад ва администрациялул пишакар Аьбдуллаев Абуссупиян.
