Муххал ххуллул переезд хъуннасса нигьачIаву дусса ва личIлулну бикIан багьлагьисса кIану бур. Переездрай бала-апатIрая мюхчанну бикIаншиврул шупIиртуран чара бакъа щаллу дан аьркинссар кIицI ларгсса тIалавшиннарду:

11:21 / 13.09. 2018
1. Переездрайх нанийни, дуруччин аьркинсса низам дуруччияра.
2. Гъан хъанахъисса поездрал хьхьичIух переездрайх гьан кьаст малахIару. Поездрах, лавхъсса фарардах ва прожекторданух бурувгун, му цуксса анаварну най буссарив ва переездрачIан цуксса гъанну буссарив кIул бан къашайссар.
Машина бацIан бувну, поезд хьхьичI итабакьияра.
3. ДакIний битияра, поезд цакуну бацIан бан къашайссар. Мугьлат бакъа бацIан бувсса чIумалгума, поезд 800-1000 метралийх лагайссар.
4. Переездрайсса светофордал переездрайх бачин къадагъа дуллалисса ятIулсса чани лавхъун махъ поезд миккун биян дурагу 30-40 секундри лагайсса.
5. Шлагбаумру дусса переезд­рай, светофорданул ятIулсса чани лахъарча, шлагбаум тIиртIуну духьурчагума, переездрайн мабу­ккару.
6. Переездрайх нанисса чIумал, хьхьичI-махъ нанисса машинарттая манзил бивтун бачияра, хьхьичI нанисса машина цакуну бавцIуну ягу шупIирнал хIурхIа бувну, зунма нигьачIаву дусса кIанттурдай бацIан бан къабагьаншиврул.
7. Переездрайхсса ххуллул зумарду дакъассар. Мичча нанийни, личIлулгу бикIияра.
8. Хьунив нанисса машинар­ттал шупIиртурайн чирахъ тIайла къабацIанну бачияра.
9. Цаппара переездирттай, шлагбаумру дакъасса, цаймигу дайгьузанну дуссар. Миннувух переездрайн буххан кьаст малахIари.

Дагъусттаннал муххал ххуллул переездирттай мюхчаншиву дузал даврил масъала буруккинсса масъала бур. Переездирттай бала-апатIру чан шаву мурадрай, ххишаласса чаран лякъин багьлай бур. Шин дайдирхьуния шихуннай республикалий муххал ххуллул переездирттай 6 ДТП хьуну дур. Миннува ца пассажиртурал поезд хIаласса дур. Ва ДТП-лий оьрмулуцIа хьуну ур шама инсан, лихха-личча хьуну ур 7 инсан.
Ца ДТП хьуну дур дежурный усса переездрай. КIицI ларгсса ДТП-тту хьуну дур Къумтуркъалаллал, Къизилюртуллал, Хасавюртуллал, Бабаюртуллал, Къарабудагъккантуллал районнай ва Къизлардай.

[dropcap]П[/dropcap]оездру машинарттайн щу­сса иширттал хIакъи-хIисав дуллалийни, чIалай бур ми циняв машиналул щупир сававну хьуну душиву. Август зурул 7-нний ссят 23.31 хьу­сса чIумал Манас-Ачи муххал ххуллул переездрай (2321 км. пк.3) поезд (№8502) щуну бур Зайнулаьбидов МахIаммадлул (1974 ш.у.) бачин бувсса ВАЗ-21014 машиналийн. Шама пассажир усса кIанай къуртал хьуну ур, щупир ва ца пасса­жир, личIи-личIисса цIунцIияртту хьуну, Къарабудагъккантуллал азарханалийн, реанимациялул отделениялийн, биян бувну бур. Ва ДТП машиналул щупир М. Зайнулаьбидов сававну хьуну дур. Ванал къадурурччуну дур муххал ххуллийх наниминнал дуруччин аьркинсса низам. ПереездрачIан нанийни ва ххуллул лишаннах, светофорданул тIалавшиндардах ургъил къадурну, увккун ур переездрайн.

Андриана Аьбдуллаева