ТIиртIунни цIусса гьайкал

[dropcap]А[/dropcap]вгуст зурул 26-нний ЦIущарнив тIиртIунни Хъун дяъвилул гьурттучитуран ва къинттуллух зий бивкIминнан хас дур­сса гьайкал.

Цакьнира шяраву диркIмур гьайкал зия хьуну, ялун уруган сий дакъа диркIун дия. Мунийн бувну шяраваллил жяматрал хIукму бувну бия цIусса гьайкал дацIан дуван. Духмур гьайкалгу, дакьингу дурну, школалул хIаятраву дацIан дуван ччай бусса бия.

[dropcap]В[/dropcap]а хасъсса иширайн шяравун бувкIун бия шагьрурдай яхъанахъисса ЦIущаннил мухлукьат. Гьайкал тIитIлай, шяраваллил бакIчи Кьурбанов Ма­хIаммадлул барчаллагь увкуна цIусса гьайкал даврил ххуллий харж бивхьусса гьалмахтурахьгу, му дуллай бивкIсса усттартурахьгу.
Гьайкал тIитIаврил мажлисрай гьуртту хьун бувкIун бия: Ккуллал райондалул бакIчинал хъиривчутал Александр Маммаев, Анатолий Давдиев, райондалул администрациялул вивсса политикалул отделданул каялувчи Шамххал Хизриев, райондалул ветуправлениялул хIакин Аьппас Мирзаев ва цаймигу.

Яла гьайкал тIитIин ихтияр дуллуна шяравусса хъунисриннахьхьун: «Знак Почета» ордендалул кавалер МахIаммад Кьурбановлухьхьун, дяъвилул ва захIматрал ветеран МахIа Буттаевлухьхьун.
Тяхъашиврул мажлисрай культуралул зузалтрал ккаккан дурна ххуйсса концерт.