ХIажибуттал арс Буттаев Насруллагь
Вай гьантрай аьпалухьхьун лавгунни жяматран бусравсса, ххаллилсса лаккучу, Чакъаллал шяравасса ХIажибуттал арс Буттаев Насруллагь.Увну ур Насруллагь 1933 шинал Ккуллал райондалийсса Чакъаллал шяраву. ЦIуссалакрал школагу къуртал бувну, увххун ур дуклан Дагъусттаннал шяраваллил хозяйствалул институтравун.
Институт къуртал бувну махъ зий ивкIун ур ЦIуссалакрал ва Чапаевкаллал шяраваллал советрал председательну, мунияр махъ зий ивкIун ур цал ЦIуссалакрал Казбековлул цIанийсса колхозрал агрономну, яла, пенсиялийн укканнин, коммунал хозяйствалул отделданул хъунаману.
Насруллагь ивкIун ур жаваблувсса къуллугъчи ва захIмат ххирасса, цала дуллалимур лажин кIялану бартдигьайсса зузала.
Давривусса хьхьичIуннайшивурттахлу ва ххуйсса ккаккиярттахлу ва лайкь хьуну ур личIи-личIисса наградарттан — хIурматрал грамотарттан, барчаллагьрал чагъардан ва бахшиширттан. Насруллагь ур захIматрал ветеран.
Аьмал-хIал бавкьусса, аьчухсса хасият дусса Насруллагь бусравну ия архIал зий бивкIминнан ва лагма-ялттунан. Ва аьпалул шаврил кьурчIишиву кIидачIлай, жижара буллай буру кулпатрахь, оьрчIахь, махъсса гъан-маччанахь.
Имандалий лавгун лякъиннав, рухI алжаннул ххари даннав.
ЦIуссалакрал жямат
Хъуннасса кьурчIишивугу кIидачIлай, жижара буллай буру ЦIуссалакрал Культуралул управлениялул хъунмур ХIабибат Буттаевахь, ванил аьзизсса ппу
Насруллагь
аьпалул шаврийн бувну.
Пирдавс алжан нясив баннав, махъминнал оьрмурду лахъи баннав.
ЦIуссалакрал райондалул Культуралул управлениялул зузалт
Кисараннул аьпалун
Жул дакIру аьчух дайсса
Ми вил пасихI хаварду
Утти къабаяншиврийн
Вих хьун бюхълай бакъару.
Агь, жул Кисаран-ссувай,
Алвагьсса дакIнил заллуй,
Циван дичин бувавкьай
Ина жу бакIру хьхьичIун.
Дунияллийх цIа дурксса
Та цува Авиценнан
Цайрамур цIуцIавринсса
Савав къаляркъуссар тIар.
Вилмур ажалданунгу
Мажал лякъин къавхьунни,
Цайминнан дарув буллай,
Винмамур къалявкъунни.
Вил рухI хъинний дишинав,
Алжаннул ххари баннав,
Тти жуяту бувцнугу
Занная къабуцаннав.
Каспийскаллал шагьрулул паркравун ккурчIа бан батIайсса лакрал хъаннил чулуха: Сабират, Гулжагьан, Аьйша, Кумсият, Жанти, Сакинат, Аня, Зоя
