Август зурул 26-нний, ЦIущаннив тIиртIунни Хъун дяъвилул гьурттучитуран ва къинттуллух зий бивкIминнан хас дурсса гьайкал. 

Цакьнира шяраву диркIмур гьайкал зия хьуну, ялун уруган сий дакъа диркIун дия. Мунийн бувну шяраваллил жяматрал хIукму бувну бия цIусса гьайкал дацIан дуван. Духмур гьайкалгу дакьин дурну школалул хIаятраву дацIан дуван ччай бусса бия.
Гьайкал тIитIлай шяраваллил бакIчинал Кьурбанов МахIаммадлул:
«ХIурмат лавайсса Ватанчитал, хъамал! ХIакьину жува шиккун бавтIссару жула ЦIущаннил шяраваллил тарихраву хъанахъисса агьамсса иширайн. Жува тIитIлай буру цIусса гьайкал. Ва хас дурссар цала жанну кьурван дурну жунна тархъиншиву бахшиш дурсса чиваркIуннан. Жула шяраваллил жяматийсса ишккаккултрал сипталийну дартIссар гьайкал дувансса арцу. На шяраваллил администрациялул, жяматрал чулуха миннахь хъунмасса барчаллагь тIиссара. Бюхълай личIаннан. Ка тIиртIунийн дияннав.Ялагу хъунмасса барчаллагь учин ччай ура гьайкал дацIан дуллай зий бивкIсса инсантурахь», — куна.
Махъру лавхъуна ЦIущаннил жямат гьайкал тIитIаврищал барча буллай, Ккуллал райондалул бакIчинал хъиривминнал Александр Маммаевлул, Анатолий Давдиевлул, райондалул администрациялул вивсса политикалул отlелданул каялувчин Шамххал Хизриевлул, райондалул ветуправлениялул хIакин Аппас Мирзаевлул ва цайминналгу.
Яла гьайкал тIитIин ихтияр дуллуна «Знак Почета» ордендалул кавалер МахIаммад Кьурбановлухьхьун, дяъвилул ва захIматрал ветеран МахIа Буттаевлухьхьун.
Хъирив хъамаллуран ва жяматран тIивтIуна авадансса дукралул ссупра.Ссупралух бунува культуралул зузалтрал ккаккан дувуна жяматран ва хъамаллуран хъинну ххуйсса концерт.

ХI. ХIусайнов