Дус-ихтивартурал ккурандалул дянив

Каспийскалий «Россия-Плаза» тIисса банкетный залдануву хьунни хъинну чIявусса бусравсса хъамалгу гьурттусса Лакрал райондалул бакIчи Юсуп МахIаммадовлул 60 шинал юбилейрал мажлис.

Байбивхьуна мажлис ДР-лул БакIчинал ва ХIукуматрал наградартту дулайсса къуллугърал управлениялул каялувчи Артур Исрапиловлул В. Васильевлул цIания Юсуп барча аврийну. Гихунмайсса мажлисрал тямадашивугу дуллайгу ия Артур Исрапилов цува.

ДР-лул Халкьуннал Мажлисрал депутат Камил Давдиевлул Юсуп МахIаммадовлун дуллунни парламентрал председатель Хизри Шихсаидовлул цIа чирчусса ссят.
Аьрасатнал Федерациялул Жяматийсса Палаталул чулухасса ХIурматрал грамота дуллунни ва палаталул член Айгун МахIаммадовлул.

Зарема Буттаевал кIицI лавгунни Юсуп МахIаммадов хъуннасса къулагъас дуллай ушиву райондалул магьирлугърах, махъсса шиннардий даххана хьуну душиву шяраваллал магьирлугърал къатрал чIалачIин, машан лавсун бушиву цIу-цIусса ярагъ, цIу дурну душиву ансамбллал костюмру.

Барча уллалисса ихтилатру бувна мукунма ДР-лул Хъунисриннал советрал хъунаманал хъиривчу Сиражуттин Илиясовлул, Дагъусттан Республикалул Жяматийсса Палаталул хъунаманал хъиривчу Ссапар Аьбдуллаевлул, Ростовуллал областьрал ГУФСИН-данул каялувчи Муслим Даххаевлул, Лакрал райондалул администрациялул бакIчинал хъиривчу Абакар Къюннуевлул, Ма­хIачкъала шагьрулул мэрнал хъиривчу Кьурбан Кьурбановлул, жяматийсса ишккаккулт Рапи Абакаровлул, Аьвдулхаликь Халикьовлул, Мариян Илиясовал цIанийсса «Дараччи» клуб­рал хъунмур Гульшан Хасаевал.

Цинявппагу барчаллагьрай кIицI лаглай бия Юсуп МахIаммадов бакIчину зун увкIния шиннай Лакрал райондалий хьусса ххуй чулийннайсса дахханашивур­тту. ЧIурчIав дуллай бия Юсуп МахIаммадов тачIав чIарах къауккайшиву миллатрайн багьай­сса цавагу иширал.
Зулайхат Тахакьаева