Сентябрь зурул 14-нний ЦIуссалакрал райондалий шадлугърал даражалий кIицI ларгунни Дагъусттаннал халкьуннал цашиврул кьини ва ЦIуссалакрал район
дунияллул террористурая мурахас дурну 19 шин бартлагаврил кьини. Мероприятиярттай гьурттушинна дан бувкIун бия Буйский ва Кумылжинский районнал, Костромалул ва Волгоградуллал областирттал делегацияртту.
ХьхьичIмур кьини хъамаллуран Дарбант шагьрулийнсса экскурсия бунни. Хъирив кьини, шадлугърал мажлис байбишиннин, кIюрххил, райондалул бакIчи ХIажи Айдиевлущал Костромаллал делегация бивунни Чачаннал ва Дагъусттаннал дазуй къуллугъ буллалисса Костромаллал областьрал УВД-лул зузалтрачIан. ЦIуссалакрал шяравун буххайни, хъамал бусравну ва хIурматрай хьунабавкьунни ЦIуссаккуллал ва ЦIуссачIурттащиял жяматрал.
[dropcap]Ш[/dropcap]адлугърал мажлис байбивхьунни шяраваллил майданнив дацIан дурсса 1999 шиналсса дяъвилул иширттаву жанну дуллуминнал гьайкалданучIа тIутIив дишаврийну. Миннал савлугъран дунни битавуртту, дуклаки оьрчIал итабавкьунни гьаваллавун кIяласса шарду. Байрандалун хасну ккаккан дунни авадансса концертрал программа. Хьунни спортрал бяст-ччаллугу. Муния махъ хъамаллурал ххал бунни Аьрасатнал халкьуннал аслийсса культуралул центр.
