Унгу-унгусса бия луттирдал мажлис

Фестивальданийн бувкIун бия чIявусса хъамал- Москавлиясса, Санкт-Петербурграясса, Белоруснавасса, Азирбижаннаясса, Къабардин-Балкьарнавасса чичулт, шаэртал, журналистал.

Сентябрь зурул 20-22-нний МахIачкъалалив Национал библиотекалий хьунни VII халкьуннал дянивсса луттирдал фестиваль «Тарки Тау 2018».
Фестиваль тIитIлатIисса шадлугърай гьуртту хьунни Дагъус­ттан Республикалул ХIукуматрал хъунаманал цалчинма хъиривчу Анатолий Карибов, Аьрасатнал луттирду итабакьултрал ассоциациялул вице-президент Олег Филимонов, Москавлиясса литературалул критик Галина Юзефович, «Литературная газеталул» политикалул ва экономикалул отделданул редактор Владимир Сухомлинин; луттирду ххираминнал союзрал хъунмур Людмила Шустова.


Мюрщи луттирдал ляличIисса ккаккия

Дия сакин дурну Эклибрисрал музейрал (эклибрис – лу­ттирал лишан, заллу цу уссарив бусласисса ва мюрщи луттирдал ляличIисса выставка. Мунил сиптачину бия Людмила Шустова. Мунил бувсунни Эклибрисрал музейрал тарихрая ва чIиви луттирая. Музей сакин бувну бур 1991 шинал «Книга» тIисса Щалагу союзрал ккурандалул. Музейрал библиотекалул дусса дур хъуннасса фонд.
«Миниатюрная книга» — мугу цир? Ва бур 7/10 см дусса хъинну чIивисса лу. Ца сантиметралулгума даччин хьурча, лу коллекциялувассаннун къаккаллину бусса бур. Бусса бур 6 миллиметра ду­сса лу. Ва бусалардавун багьсса лу билаятрал бакIчи В.В, Путиннун пишкаш бувну бур куя каних зузисса Ссибирнавасса усттарнал.
Ахирданий Людмила Шустовал дипломру ва каталогру буллунни Дунияллул халкьуннал дянивсса жагьилтурал конкурсрай ххув хьуминнан.
МаслихIат бунни Москавлив аьрххи багьувкун музейравун бучIан. Цувгу бусса бур ЯтIул Майданния арх бакъа. Хъамалудушнин бахшишран библиотекалул зузалтралгу дуллунни цала музейрал экспонатру.

Къабухлаган­тIиссар луттирду

Мюнпатсса хьунабакьаву хьунни «Литературная газеталул» отделданул редактор Владимир Сухомлининнущал. Муний ихтилат бия печатьрал изданиярттал бучIантIимунийн ва луттирду бухлаглагаврийн багьайсса.
«Жунма чIалай бур оьрму цукун баххана хъанахъиссарив, ялун дукIлай дур цIу-цIусса технологияртту. Жяматийсса транспортрай наниминнаву нажагьвагу хьунаакьлай акъар лу канихьсса инсан. Гьарцаннахь дур смартфонну,» — увкунни Сухомлининнул.
ХIакьинусса кьини жула ва буруккин бухьурчагу, аьдатсса луттирдал кIану ссалчIав къабугьантIиссар.

Аьрасатнал ца яла машгьурма чичущалсса хьунабакьаву

Хьунни хIакьинусса кьини Аьрасатнаву ца яла машгьур­сса чичу Левсет Дарчевлул лу­ттирал презентация. Ванал лу­ттирду лув къаличIайсса бур. Ванал произведенияртту таржума бувну бусса бур ингилис мазрайн. Ва ур «Ккавкказ – жула аьмсса къаттар» тIисса сайтрал автор. Чичул хъунмур даву дусса дур Ккавкказуллал магьирлугъ машгьур дуллалисса. Бувсунни цала луттирдаяту. «Обожённые Бураном» тIисса луттирай бувсун бур «Бявкъусса дяъвилул» чIумал кьюлтIсса иширттаха зузисса летчик-испытательтурал кьадардания. Ца ссигъасса тагьарданий цинявппа летчиктал ливтIуну бур цаннал хъирив ца апатIирттахьхьун биривну. Авторнал тIутIимунийн бувну роман чивчуну бур фантастикалул журалий. Ттигъанну дунияллийн бувккун бур ванал цIусса лу «Афганец: оставшийся в прошлом».

Балкьарнал шаэр, СалихI Гуртуевлущалсса хьунабакьаву

Шаэрнащал кIулгу бувну, ганал оьрмулия бувсунни Дагъус­ттаннал кIулшиву хьхьичIуннай даврил институтрал проректор, филологиялул элмурдал кандидат Миясат Муслимовал. СалихI Гуртуев ур кьуния­сса шеърирдал луттирдал автор. МахIачкъала шагьрулул дуклаки оьрчIал дурккунни ватандалуха назмурду. СалихI Гуртуевлул балкьарнал мазрайн таржума бувну бур тамансса дагъусттан шаэртурал шеърирду.

Магьа куннасса хьунабакьаву

Магьа куннасса хьунабакьаву хьунни оьрчIал чичу, магьричичу «Золотое перо России» премиялул лауреат Валентин Постниковлущал.
Ванал дуклаки оьрчIахь був­ккунни цала шеърирду ва цаймигу оьрчIан ххуй бизайсса личIи-личIисса темардайн багьайсса шеърирду. Сакин дунни ссигърал конкурс – оьрчIал ва душварал дянив. Конкурсрай ххув хьунни оьрчIру.
ОьрчIан ххуй бизайсса балайрду тIутIи бувну, цувагу гайннацIун бахIлай ия чичу. Рязину ливчIунни оьрчIру магьлуха лархьхьусса хьунабакьаврия.

Хъямала буллай бия классикалул луттирду

Хьунни оьрчIансса луттирду итабакьайсса «Август» тIисса идаралул директор Мария Вайсманнущалсса хьунабакьаву. Ва идаралун гьашину хьуну дур кьура шин. Идара зий бур классикалул чичултрал произведенияр­тту, чIюлугу бувну, цIунил итабакьавриха. «Августрал» луттирду презентация даннинма бухлавгун бия.

«Кавказский экспрессрал» цIусса маршрутру

«Кавказский экспресс» — му бур 2016 шиная шихунмай итабакьлай байбивхьусса литературалул ва художествалул альманах, цилгу машгьур дуллалисса Дагъусттаннал халкьуннал магьирлугъ.
2017 шинал альманах лайкь хьуну бур «Тарки-Тау» фестивальданул Гран-приран.
Семинарданий гьуртту хъанахъими буслай бия кIира шинай дурсса ва ялун нанисса шинал дан дакIнийсса давурттая. Альманахрал хъунама редактор. Марат ХIажиевлул бусласимунийн бувну, Экспессрал бусса бур хасъсса «вагонну»: «Почтовый вагон», «Воспоминания», «Дневники» ва цаймигу. Дунияллийх сайр буллай, баххана хъанай бусса бур шиная шинайн цIу-цIусса вагонну ххи буллай.
Гьуртту хьунни семинарданий альманахрал автортал, редактортал, буккулт.

Дяъвилулгу дуссар цинна хасъсса романтика

Хьунни «Афганистан: пули, судьба…» проектрал автор Василий Прохановлущалсса хьунабакьаву. Авгъанистаннайн багьайсса проектраха Проханов зий ур тихсса дяъвилул ишир­ттаву гьуртту хьусса цала буттащал. Бувсунни Авгъанисттаннал тарихрая, аьдатирттая, багьу-бизулия ва дяъвилия. Ккаккан дурунни дяъвилул чIумалсса ролик. Цала буттая буслай, Проханов тIий ур: «Ттул ппу ссаллив кIункIу уллай ия тихун. Дяъвилулгу цанна хасъсса романтика духьунссар. Вамур чулухарив, нигьачIисса тагьар яла лаг­лай дакъая». Роликрай ккаккан бувну бур дяъвилул биян був­сса бала. Прохановлул, цала гитаралийгу руцлай, увкунни, дяъвилиягу зана хьуну, ЯтIул Майданив Ххувшаврил байрандалий гьуртту хъанахъисса солдатнахасса балай.

«Тарки-Таулул» цIурду»

Фестивальданул махъра-махъсса кьини хьунни оьрчIал дакIних шеърирду буккаврил конкурс — «Тарки-Таулул» цIурду». Муний гьуртту хьунни МахIачкъала шагьрулул школарттал дуклаки оьрчIру.
Ссихьрал театрданул бивхьуна А.Н. Толстойл «Гуси-лебеди» тIисса магьлул спектакль.