Гьунар бусса оьрчIансса проект

«Итххявхсса оьрчIру» («Одаренные дети») тIисса интернет-порталданий ва шинал щаллу дурссар оьрчIру хьхьичIунмай баврийн, миннавусса гьунарду итххяххан баврийн, миннаву граждан позиция щаллу шаврийн тIайла дурсса, махъа нанисса ник ватан ххирану, мунил лавгмур кIулну ва бучIантIимунил ялув пикри буллай тарбия хъанахъаву мурадрай щаллу дуллалисса щалагу Аьра­сатнал лагрулийсса проект. Мунил лагрулий хьуссар культуралийн, спортрайн, лингвистикалийн, ихIсаниятрайн, волонтершиврийн, социал проектру ишакаш даврийн дагьайсса 30-нния лирчусса конкурсру. Миннуй ххув хьуминнавух бур Дарбантуллал 20-мур школалул дуклаки душ Эльвира ХIажикаримовагу.


Бадрижамал Аьлиева
Проект щаллу дурну дур Гуманитар кIулшиву ласаврил информацион технологиярттал институтрал, АьФ-лул Президентнал грантрацIух.
Проектрал конкурсирттай ххув хьусса, Аьрасатнал личIи-личIисса субъектирдаясса 137 оьрчIайн шанма гьантлийсса оьвкуссар Москавлив, гъинттулсса «ПатриУм» школалийн. Миннавух – «Диалог вещей» конкурсрай кIилчинсса кIану бувгьусса Эльвира ХIажикаримовайнгу.

Билаятрал хьхьичIунсса оьр­чIан шадлугърал тагьарданий наградартту, бахшишру дуллуссар Федерациялул Советрал Элмулул, кIулшиву дулаврил ва культуралул комитетрал председательнал цалчинсса хъиривчу Лилия Гумеровал.
Хьунабакьаврий оьрчIал бувну бур «Я.СемьЯ.РоссиЯ» темалийн багьайсса хъун ба­къасса докладругу. Ва аьрххилул лагрулий оьрчIру хьунабавкьу­ссар бусравсса инсантуращал, гьуртту хьуссар личIи-личIисса конкурсирттай, викторинардай, мастер-классирттай, бивссар морожнилул «Баскин Роббинс» тIисса цIанилусса фабрикалийн, Москавуллал планетарийлин. ОьрчIан дурссар Москавлийх­сса экскурсиягу.
«ПатриУм» школалул даву щаллу хьуссар гьунар бусса оьрчIал ккаккан дурсса концерт­райну.