[dropcap]С[/dropcap]ентябрь зурул 18-нний жун цинявннанмагу ххирасса ниттирссин, буттарссин Пазилатлун там хъанай дур оьрмулул 80 шин.

МахIаммадлул душ Пазилат бувссар Читтурдал шяраву 1938-кусса шинал,

цIанихсса Илиясовхъал тухумраву.  Читтурдал жяматрал хъаннил дянив ванил цалчин ларсъссар педагогикалул ларайсса даражалул кIулшиву ва цаппара хIаллай зийгу бивкIссар шяраву учительницану. МахIачкъалалив бивзун махъ дарс дихьлай бивкIссар шагьрулул 9-мур школалий. ОьрчIахсса ччаву дакIниву мудангу ххишаласса учительница ххирасса бивкIссар учениктурангу.
Муния мукьах Къабардиннавун бизан багьсса Пазилат зий бивкIссар тиккугу мува цила пишалий. Тиха зана хьуну махъ зун бувхссар дахьа цIуну тIивтIусса МахIачкъалаллал Булочно-кондитерский комбинатрайн, кадрардал отделданул начальникну. Миккугу мунил цIа бусраврай ва хIурматрай цIакь хьуссар щалвагу коллективрал дянив ва чIал къавхьуну цуппагу бувчIуссар парторгну. Гьарцагу зузисса кIанттай Пазилатлул хIалал бувссар анжагъ кьадру ва кьимат, кьадиртссар цилла уздансса цIа.

Гьай-гьай, оьрмугу так ца ххуй-хъиншивурттал бувцIун­масса къабикIай. Хьуссар Пазилатлул оьрмулувугу диялсса кьурчIишивуртту, духIан багьссар цила ца яла язисса инсаннал чулухасса хаиншивугу, дирчуссар чIярусса хIасратрал хьхьурдугу. Амма чIал къавхьуну ванил чIарав хьуссар гьарца чулуха оьвхъусса, аькьилсса, жун цинявннанагу ххишала акъа ххирасса «дядя Исмяил». Мунал цайнма лавсъссар ванил циняв­ппагу буруккинтту, лайкьну хъуна увссар ванил арсгу. Мукун дугърисса ва дакI авадансса адамина чIарав уну тIийри Пазилат хIакьинусса кьинигу исвагьину ва элегантнайну чIалачIисса. Пазилатлун талихIрал ва мурадирал кюруну хъанахъиссар ванил кулпат: лас Исмяил, арс Руслан, душ Мариян. Ванинсса ляличIинурасса бахшишну бу­ссар арснал ва душнил оьрчIругу – ХIасан, Наби ва Зулайхат. Вайнная укун ххаллилсса инсантал шавривугу буссар Пазилатлул тарбиялул биялсса бутIа.

Жун хъинну хъуннасса ххаришивуну шайссар жула агьлу-авладрал хъатIай, ххаришивур­ттай Пазилат цила аьзиз­сса арс Русланнущал къищуну къавтIисса чIумул мутта.
Барча вил хъуннасса юбилей, жул чIалачIин дакъасса ни­ттирссий, буттарссий! Ябаннав ина Заннал цIуллуну жун цинявннансса тирххандаран! Ина жуйн бивтсса бургъил чанира!
Виха мудангу дуаьлийсса вил ссурваврал ва уссурваврал оьрчIру