Сентябрь зурул 3-нний МахIачкъалаллал майданнив хьусса Терроризмалущалсса талатавриву цашиврул кьинилун хас дурсса акциялий гьуртту хьунни
Дагъусттаннал БакIчинал буржру чIумуйну биттур буллалисса Владимир Васильев, Халкьуннал Мажлисрал председатель Хизри Шихсаидов, премьер-министр Артем Здунов, ДР-лул БакIчинал ва ХIукуматрал администрациялул каялувчи Владимир Иванов, ДР-лул муфтий шайх АхIмад Апанди.
Андриана Аьбдуллаева
[dropcap]В[/dropcap]а кьини шагьрулул хъун майданнив терактирдаву ливтIуми дакIнийн бичин бувкIун бия властьрал органнал вакилтал, студентътал, жяматийсса ва динийсса организациярттал вакилтал. Вай цивппагу, «нет террору» тIисса хIарпру дагьан дурну, бавцIуну бия кьюкьрай. Аьрасатнал личIи-личIисса шагьрурдай терактирдай оьрмулуцIа хьуминнал аьпалун минутIрайсса пахъ багьавугу дурну, ссурулун итабавкьунни кIяласса шарду.
БавтIминнал хьхьичI ихтилат бунни Владимир Васильевлул.
— Террорданийн данди бавцIуну, жанну дуллуссар, ихтиярду дуруччай органнаву, аьралуннал структурардаву, хасъсса подразделениярттаву зузиминнал дакъассагу, ополчентурал кьюкьраву талай бивкIсса дагъусттаннал агьалиналгу. ОьрмурдацIа хьуссар чIявусса диндалул агьлу. Инсаниятрайн ссивцIу багьсса террорданул идеологиялул щийчIав рахIму-цIими буллай къабивкIссар. Цинявппа цачIун хьунур жущава террорданун ххуллу кьукьин бювхъусса, — увкунни республикалул БакIчинал.
Ванал оьвчаву дунни агьалинайн хIакьину жучIава хьунабакьлакьисса буруккинсса масъалартту щаллу бавриха зун, барчаллагь увкунни Москавуллал хIукуматрахь МахIачкъала шагьрулул хъун майдан бакьин бан ка-кумаг буллай тIий. Цала ихтилатраву Владимир Васильевлул мукунма кIицI лавгунни республикалул каялувчитурал кумаг буллантIишиву къуллугърал бурж биттур буллай жанну дуллусса зузалтрал кулпатирттан.
Хъирив ихтилат бунни Дагъусттаннал Ветерантурал советрал председатель МахIарам Аьлиджановлул. Ванал кIицI лавгунни республикалий цин лархьхьусса низам ва паракьатшиву хьушиву Владимир Васильев увкIун махъ ва чIа увкунни мунан ялун нанисса бувчIавурттай ххувшаву.
Терроризмалийн къарши бацIавриву цинярдагу диннал агьлу цашиврия, Дагъусттаннай аьвзалзаманная шихунмай личIи-личIисса диннал агьлу нахIуну, бавкьуну ялапар хъанай бивкIшиврия бусласисса ихтилат бунни ДР-лул муфтийнал цалчинма хъиривчу Аьбдул Аджималлаевлул. Ихтилатру бунни мукунма Дагъусттаннал Халкьуннал хозяйствалул университетрал ректор ХIамид Бучаевлул, 1999 шинал Бущихъиял райондалий кIанттул ополчентурал командирну ивкIсса, Къучагъшиврул ордендалул кавалер МахIаммад Юсуповлул, Дагъусттаннал халкьуннал шаэр, Марина АхIмадовал, «Лезгинка» ансамбльданул директор Жамбулат МахIаммадовлул, олимпий чемпион Мансур Исяевлул.
