Сентябрь зурул 3-нний Дагъусттаннал БакIчинал буржру биттур буллалисса Владимир Васильевлул,
Дагъусттаннал виваллил иширттал министрнал кIанайсса виваллил къуллугърал полковник АхIмад Баталиевлул, виваллил иширттал министрнал хъиривчу, полициялул полковник Дмитрий Гутырял, республикалул хIукуматрал, жяматийсса организациярттал вакилтурал ва МВД-лул зузалтрал дакIнийн бивчунни къуллугърал бурж биттур буллай жанну дуллусса ихтиярду дуруччай органнал зузалт, дирхьунни тIутIив миннал аьпа абад бан Виваллил иширттал министерствалул къатрал хьхьичI дацIан дурсса гьайкалданучIа.
А. Аьбдуллаева
Жулва оьрмулуву, дакIурдиву кьурчIисса асарду кьабивтсса лухIи кьинину лирчIунни Бесланнал школалий яла оьзрумур теракт дурсса, мюрщи оьрчIай аькьлулуща лаласун къабюхъайсса къия дурсса. Жула республикалул агьалинангу Къизлардай, Буйнакскалий, Каспийскалий дурсса оьхIалсса терактирдацIун дархIусса, тачIав дакIния къадуккайсса оькьинину хъанай дур. Укунсса ишру тикрал хьун къабитан жанну дуллуну дур цикссагу ихтиярду дуруччай органнал зузалтрал. Циксса шинну гьарчагу, абадлий дакIний дикIантIиссар къучагъшиврий жанну дуллуминнал цIарду.
