Дунияллийцири азардаву ца яла захIматмур азарданун ккаллийну дур буллёзрал эпидермолиз цIуцIаву, ва цурдагу генетикалул азар дур.Ванил инжитсса оьрчIал бурчуйн цахъи цIун хьунну ка лаярчагума, ччурччусса куннасса щавурду личIайсса дур. Мунияту укунминнайн «чIимучIалт-оьрчIру» учай, миннал бурчу чIимучIалтрал хъаттирду кунна заэвсса дуну тIий.

П. Рамазанова
Дагъусттаннай укунсса цIу­цIаврил азурда уллалисса 150 оьрчI усса ур. Миннал ниттихъул кьамул бунни вай гьантрай респуб­ликалул муфтий АхIмад Апаннинал. Ниттихъал бувсунни му цIуцIаврил бас буллалисса цалва оьрчIру къаххуйсса тагьарданий ва кумаграх мюхтажну бушиву. Бувсунни ца оьрчIан зуруй дянивну 150 азарда къуруш аьркин дагьайшиву – бурчуй щавурду къахьуншиврул бахIайсса бинтирдах, аьркинмуних.

«Инсан» тIисса фондрал ген­директор МухIаммадрасул АхIмадовлулгу бувсунни мукун­сса оьрчIава фондрал 45 аякьалийн лавсун ушиву, амма кумаг биял хъанай бакъашиву. Муфтийнал маслихIат бунни «Инсан» фонд­рал хъунаманахь му азарданул къашавайсса оьрчIан аьркинсса кумаг буллантIисса медициналул центр тIитIин, ххуйсса хIакинталгу кIункIу бувну. Бувсунни мукунма жучIара республикалий оьрчIал бурчу кай-кай буллансса ххуйсса материал итадакьлансса чараба­къашиву душивугу. Муфтинал махъ буллунни цIуцIаврил къиялийсса оьрчIан кумаг буллан, «Инсан» фондрал хIарачатрайну миннан кумагрансса арцугу датIин.