АхIмад- Хан Султа­ннул цIа­нийсса Ма­хIач­къа­лаллал аэропорт­рал гендиректор Арсен ПирмахIамма­довлул баян бунни хIажлийн наними ххила­ххаву къуртал хьушиву, гьашину 8939 инсан иян увшиву, сайки микссава, яъни 8911инсан, махъунайгу иян увшиву.

Тихун ххилай байбивхьусса цалчинмур рейс дурну дур август зурул 27-нний, тиха­сса махъра-махъмур – сентябрь зурул 8-нний. Ванал бувсунни аэропортрал циняв зузалт таможнялул ва дазурду ядуллали­сса къуллугърал зузалтращал бавкьуну, уртакьну зий бивкIшиву, ларайсса даражалий ва сантирай даву дачин дурну бивкIсса зузалтран премияртту дулунтIишиву. Ванал мукунма кIицI лавгунни МахIачкъалаллал аэропортрал, республикалиясса бакъагу, цайми регионнаятусса инсанталгу хIажлийн биян бувайшиву ва тиха буцайшиву, дукIугу сайки 20 азара инсан нанинийн биян бувшиву хIажлил чIумал.

Бусурманнал хIаж буллай азаллий ххюттуршра шин шавай дусса дур. Исламрал диндалул тарих байбивхьуния шинмай щаллагу дунияллия лагай Маккалив ва Мадиналив Аллагьу Тааьланал хьхьичIсса цала бурж биттур буван ччими. Аьра­сатнава хIажлив заназиминнал тарихрал дур цилла кьараллу, хасшивуртту. ХIаж баврил низам ккаккан дуллали­сса цалчинмур документ хъанай бу­сса бур 1902 шинал итабавкьу­сса, «Бусурманнал хIаж баврил чIумуйнусса низам» («Временные правила о паломничестве мусульман») тIисса.

1917 шинал хьусса революциялул ва мунил хъирив дуркIсса коммунистурал хIукуматрал хIаж баврил иширттайн биял­сса асар биян бувну бур: ларгсса ттуршукулул 45-ку шиная 90-ку шинайн бияннин Совет билаятрая хIажлив лавгун ур дахьа 900 инсан. Му хъанай бур дянивну 20 инсан ца шинай.

П. Рамазанова