Нюжмар кьини, сентябрь зурул 14-нний, Дагъусттаннай, Каспий хьхьирил зуманив шадлугърал даражалий тIивтIунни Аьрасатнал МСЧ-рал (медико-санитарная часть) реабилитациялул центр.Шикку гьуртту хьунни ДР-лул виваллил иширттал министр Аьвдурашид МахIаммадов, Аьрасатнал МВД-лул агьаммур управлениялул Ухссавнил Ккавкказуллал федерал округрайсса хъунама Сергей Бачурин, Аьрасатнал МВД-лул арцул, техникалул ва медициналул дузалшиндарал Департаментрал хъунаманал хъиривчу, Медициналул дузалшиннарал управлениялул хъунама Виталий Сидоренко, Дагъусттаннал БакIчинал ва ХIукуматрал администрациялул каялувчи Владимир Иванов, Центрданул зузалт ва Центрданул къатри дуллай бивкIми.

---

Андриана Аьбдуллаева
Шадлугърал мажлис тIитIлай, ихтилат бунни Аьвдурашид МахIаммадовлул.
— Аьрасатнал виваллил ишир­ттал органнай зий ттул 32 шинни.
ХIакьинусса кьини ттул оьр­мулуву ца яла ххаримур кьинир, цанчирча ттун бувчIлай бур ва Центрданул агьамшиву ва чара бакъашиву цIана жучIава зузиминнангу, отставкалийн бувкминнангу. Ва Центрданул масъала гьаз бувсса чIумал, ванил аьркиншиву чIалай, жуцIун бавкьунни билаятрал къуллугъчитал, итадаркьунни вай къатри дансса арцу.

Виваллил иширттал органнаву зузими лайкьссар къулайсса шартIирдай хъин хъанан. Инсан цала оьрмулуву, та ухьурчагу, хIакинтурайн къавщуну къуртал хъанай акъар. ХIакиннал дурсса къулагъасрал бияла хъунмассар. Ца-ца чIумал хIакиннал инсаншиву ссаяргу ялтту дуккайссар, — увкунни министрнал. Ванал барчаллагь увкунни Центр бан кумаг бувминнахь, чIарав бавцIуминнахь, строительствалул давуртту дуллай бивкIминнахь.

Хъирив ихтилат бувсса Сергей Бачуриннул Аьрасатнал виваллил иширттал министр Владимир Колокольцевлул цIания барча кунни зузалтрахь ххаллилсса Центр тIитIаву. КIицI лавгунни ДР-лул Виваллил иширттал министерствалул оьр­мулуву дакIний личIансса кьини хъанахъишиву ва, Центрданий медициналул зузалтрангу, пациентътурангу ххаллилсса шартIру дузал дурну душиву.

Владимир Ивановлул барчаллагь увкунни Центрданул къатри дуллай зий бивкIсса строительтурахь, энергетиктурахь. Центрданул зузалтрахь ванал увкунни:
— ЗучIан букIлантIиссар цайми кIанттурдаясса зула коллегахъул. На чIа тIий ура, Центр­данийн букIлакIими, щавурду дирну, цIунцIияртту хьуну къабучIаваннавча, караматсса Дагъусттан ккаккан, Кас­пий хьхьирил щинавун бучIан, марцIсса гьавалий бигьалаган бучIаваннав…

Центрданул къатравунсса дарваза тIитIлай, кьувкьунни ятIул лента. Цинявппа къатригу ххал бувну, бувххуна залданувун. Шикку ведомствалул чулухасса хIурматрал грамотартту ва барчаллагьрал чагъарду буллунни хьхьичIунсса полициялул зузалт­ран ва Центрданул къатри дуллай бивкIсса строительтуран.

Ахирданий «Лезгинка» ансамбльданул ва Дагъусттаннал эстрадалул балайчитурал кка­ккан дунни ххаллилсса концерт.
Концерт къуртал хьуну махъ гьарта-гьарзасса чIюлусса хIаят­раву ва ххарисса иширал савлугъран дурунни салютру.