Ххуллункьини Читтурдал шяраву тIиртIунни жула ххирасса Марияннун гьайкал. Марияннул аьпа учин, ва дакIнийн бутан бувкIун бия мухлукьат: лакрал щархъал,культуралул ва кIулшивуртту дулаврил идарарттал, «Дараччи» клубрал вакилтал, Илиясовхъал агьлу-авлад. Пашманшиву дия дакIниву, хъювсул уклай ия гьайкалданийн я тIайла бавцIума.
ТIутIив, тIутIив, тIутIив… Цаннияр ца ххуйсса кацIру — Марияннухсса ччаврил, хIурматрал, ванил бусравшиврул барашинна.
Жуятува личIи хьуну махъгу цачIун бунну жува Мариян ЧIибиевнал. ЦукунчIав вих хьун ччай бакъар ва бакъашиврийн, цукунчIав ччай бакъар вания ларгсса чIумуй гъалгъа тIун. Ва бия бургъил нур кунмасса, чани ва гъилишиву нанисса инсан. Ва буний дикIайва ца аьжаивсса хIикматшиву, нахIушиву, рахIатшиву. Ванил дакIниву бия гьарнансса кIану.
[dropcap]М[/dropcap]арияннул гьайкал тIитIлатIисса мажлис бачин бувну ия Рапи Абакаров. Ва дакIнийн бутлатисса, ванил ххаллилсса давурттая бусласисса ихтилатру бувна Лакрал райондалул бакIчи Юсуп МахIаммадовлул, шаэр Даниял Магьдиевлул, Марияннул урчIака, Мариян Илиясовал цIанийсса «Дараччи» ихIсандалул фондрал цIанасса каялувчи Гульшан Хасаевал. Цала ихтилатраву Даниял Магьдиевлул кIицI лавгунни инттухунай, дараччи тIутIив хъякусса чIумал, дуклаки оьрчIащал ва учительтуращал миннул кацIру бишин учIантIишиву Марияннул гьаттайн.
Гьарцагу ихтилатчи, ца зумату куна, кIицI лаглай ия, дакIгу, кагу тIиртIусса Марияннул цила ххаллилсса давурттайну, инсаншиврийну, чумартшиврийну сагъну бунува дирхьушиву цинна гьайкал. Марияннун лайкьсса гьайбат дусса дия гьайкалгу. Гьайкалданий дия укунсса чичру:
Шадшиврул пар бусса
яру, иминсса,
Къума ларгсса дакIру
чанна дувайсса,
ЛивчIунни га чани вияту бивсса
Бургъил тураннуну
ссавния дуркIсса.
Ина Алжаннаву мина
дирхьунни,
Винна паракьатшив
миву ляркъунни.
Каруннил гъилишив
жун кьадиртунни,
Вищал бувтсса гьантри
талихIну хьунни .
