Аьрасатнал Ттугълил кьини Каспийскалив хьунни республикалул байран – «Къари-бавахъал фестиваль – 2018». Укуннасса фестиваль хьуссия Каспийскалий ларгсса шиналгу. ДукIугу, гьашинумур фестивальданийгу язимур программа дия
хордал бяст-ччал. Ларгсса шинал Къизлардаясса, Каспийскалиясса къари-бавахъал хорду гьуртту хьухьурча, гьашину чиваркIуннал хоргу гьуртту хьунни – Агъай Къаплановлул цIанийсса арамтурал халкьуннал хор «Къарабудахккант».
П. Рамазанова
[dropcap]Ф[/dropcap]естивальданул сиптачиталну бия «Аьрасатнал ниттихъул» суккушиндарал региондалулмур отделение.
Фестивальданий гьурттушинна дунни МахIачкъалаливсса ГБУ «Ветеран» тIисса Бугьараминнал ва мушакъатминнал интернатралгу. Ва идаралий хъунмур медсестрану зузисса, 1-мур ЦIувкIратусса Асият Дукиевал бувсунни цуппа зузисса «Ветеран» интернатрал къари-къужри укунсса байраннах мякьну бикIайшиву, бугьарасса ва инжитсса инсантурал дакIру шад дуллалиминнайн мудангу барчаллагьрай бушиву.
Фестивальданий гьурттушинна дунни Ваччату бувкIсса Нурижат Муслимовалгу. Ва фронтовик Юнус Муслимовлул щащарди, ванил мудангу хьхьичIунсса гьурттушинна дувайссар Ккуллал райондалий хъанахъисса культуралул шадлугъирттай. Балай учаврил, къавтIун бизаврил гьунар бусса бушивруцIун, хъярч-махсара ххирасса, инсантурал дакIру тяхъа дуван гъирасса, дакI-аьмал хъинсса инсан бур. «ДакI жагьилну духьурча, шинну дуссаксса дикIанссар, карчI ттуяту архсса затри.
Ва Каспийскаллал Культуралул Дворецрал майданнив къавтIун бизан бувкIра, Лаккуйсса къари-бавахъавугу паргалну къавтIун кIулсса гьунарду бушиву ккаккан буван. Ва фестиваль лайкьсса даражалий дувансса хIарачат бувминнайн, «Аьрасатнал ниттихъул» ккурандалул хъунмур Таиса МахIаммадовайн, Каспийскаллал библиотекарттал хъунмур Мадина Темировайн, шагьрулул администрациялийн барчаллагьрай бура къари-къужри ххари бувансса байран дуваврихлу. Цинявннал ца ххуйну хорданий Расул ХIамзатовлул «Кьурукьру» тIисса балай увкунни, фестиваль къуртал дуллай. Ва балайлул мудангу азарва журасса асарду бичай дакIурдивун. Байрандалул лахIзарду хъамакъабитансса хьунни», — увкунни Нурижат Муслимовал. Ларгсса шиналмур фестиваль шагьрулул 70 шинал юбилейран хас дурну диркIхьурча, гьашинумур Расул ХIамзатовлун 95 шин шаврин хас дурну дия.
