[dropcap]А[/dropcap]вгуст зурул 29-нний Владимир Васильев гьуртту хьунни АьФ-лул ХIукуматрал председатель Дмитрий Медведевлул каялувшиндарай хьусса мажлисрай.

Видеоконференциялий цIу­сса дуккаврил шинайнсса хIадуршиннардая бувсунни регионнал бакIчитурал, министерстварттал ва идарарттал каялувчитурал.
Дмитрий Медведевлул, оьрчIахь ва студентътурахь дуккаврил шин барча дурну махъ, ххал диргьунни школарттал дузалшиннардал, санитариялул, мюхчаншиву дуру­ччаврил тагьар. Мукунма сукку бунни дуккаврил даража гьаз баврил ва педагогтуран харжру булаврил масъаларттугу.

— КIулшивуртту дулаврил ма­съаларттаха зий буссар кIива министерство, мунийн бувну регионнайсса властьрал органнугу хIала-гьурттуну зун аьркинссар «Дуккаву» тIисса миллатирттал проектраха. Жула мурадну хъанахъиссар 6 шинал мутталий кIулшивуртту дулаврил дунияллий хьхьичIунсса 10 хIукуматрал сияхIрайн лахъансса.

[dropcap]Б[/dropcap]ур школартту цIусса кьай-кьуй дучIан дурсса, классру ва спортзаллу цIу буккан бувсса, дукра дувайсса кIанттурду низамрайн бувцусса – хIасил, цимурцаннул дузал бувсса.
КIира региондалий личIаннин, школартту щаллу бувну бур уква­сса луттирдал. БацIан аьркинссар вай регионнай луттирду дузал баврил ялувгу. Аякьалийн лавсун бу­ссар автобусирттай оьрчIру школарттайн биян баврил масъалагу. Ларгсса шинал Аьрасатнал регионнайсса школарттан буллуссар 1500 автобус. Чара бакъа бацIан аьркинссар школарттан итабавкьусса автобусру цIу буккан баврил ялув, — увкунни Дмитрий Медведевлул.

Ванал мукунма кIицI лавгунни жула региондалий чансса бакъашиву гьануцIакул цIу буккан бан аьркинсса школартту. Премьер-министрнал бувсунни вай масъалартту щаллу баврицIун кабакьу буллай бушиву.
Гьашину 1-мур сентябрьданий 1-мур классравун дуклан гьантIиссар 51200 оьрчI, ларгсса шиналнияр 2300 ххишаласса.
2018 шинал сентябрь зурул 1-нний тIитIинтIиссар 5440 дуклаки оьрчIансса 15 цIусса школа. Республикалий шанна сменалий дарсру дихьлай бивкIсса 7 школа кIира сменалий зузи бантIиссар.