Магьирлугърал видурцIусса 80 шин

Августрал 29-нний Аьрасатнал искусствалул лайкь хьусса ишккакку, актер, режи­ссер, сценарист Ислам Казиевлул оьрмулул 80 шинал юбилей кIицI ларгунни. 

Республикалул магьирлугърал ва искусствалул пишакартурал чулуха юбиляр барча унни ДР-лул культуралул министрнал буржру чIумуйну биттур буллалисса Зарема Бу­ттаевал.


Культуралул министрнащал юбиляр барча уван бувкIун бия мунил хъиривчу Мурад ХIажиев, Дагъусттаннал Театрдал ишккаккултрал союзрал председатель, Къумукьнал театрданул художествалул каялувчи Айгум Айгумов ва Оьруснал театрданул хъунама режиссер Мавлет Тулпаров. Культуралул министрнал, юбиляр барча уллай, бунни мунал чIярусса шиннардий бувсса дакIнийхтунусса захIматран кьимат бишлаши­сса ихтилат.

Абхазнал СССР-нул лайкь хьусса артист, АьФ-лул искусст­валул лайкь хьусса ишккакку, Амашлул арс Ислам Казиев увну ур 1938 шинал августрал 29-нний Дагъусттаннай, Кастек тIисса шяраву. 1962 шинал Б. Щукиннул цIанийсса театрал училище, 1969 шинал ГИТИС-рал режиссертал шайсса факультетгу бувккуну, ларгсса ттуршукулул 60-ку шиннардил ахирдания шинай жулла республикалий кIулну ур хъуннасса кIушиву дусса режиссерну.
ДГУ-лул культуралул факультетрал актертурал магьиршиврул кафедралий 20-хъайсса шиннардий каялувшиву дуллай, уттинин ванал Дагъусттаннал миллатирттал театрдансса жагьилсса актертурал цимирагу ник чивун дуккан дурну дур.