[dropcap]С[/dropcap]таврополлал крайрай, Пятигорск шагьрулий, Машук зунттул ухнилу нанисса Ухссавнил Ккавкказуллал жагьилтурал «Машук – 2018» форумрайн увкIунни Аьрасатнал Федерациялул Президент Владимир Владимирович Путингу.
[dropcap]П[/dropcap]резидентнал ххал дунни выставкартту ва экспозицияртту, яхши-хаш бунни СКФО-лул регионнаясса делегацияр­ттал вакилтурахь. Жагьилтурал билаятрал бакIчинан ккаккан дунни цалла-цалла проектру.

Владимир Путиннущал Дагъусттанная­сса жагьилтурава ихтилатру бунни Рамазанов Исял ва Ковнир Аннал. Президентнахь Исял бувсунни цува МахIачкъалаллал шагьрулул волонтертурал корпусрал каялувчи ушиву ва щалагу Аьрасатнал «Уздан­сса тIуркIурду» («Чистые игры») тIисса проектрал региондалийсса координатор ушиву, бувсунни му проект Дагъусттаннай цукун щаллу дуллай буссарив. «Уздансса тIуркIурду» дур экологиялул проект, хъун дакъа­сса фестивальданул журалий дуллали­сса. Мунил гьурттучитал, командарттайх бавчIуну, цIинцI-ччюрк датIавриву кувннащал кув бястлий буккайссар.

Му проектравух гьурттуну бур Аьрасатнал 100-нния ливчусса шагьрурду. Уттинин бувну бур 250-нния ливчусса «Уздан­сса тIуркIурду», дартIун дур ччюрклил 400-нния лирчусса тоннарду, миннувагу дачIими – кIилчин ишла дувансса материалданул ххуллий тIайла дурккун дур. Да­гъусттаннай му проект щаллу дуллай бур Каспий хьхьирил зумардай.

Аннал президентнан ккаккан дурсса проект дур «Кулпатрал гъилишиву» тIисса, му проектрал агьаммур мурадгу бур ччимур кулпатраща социал агьамшиву дусса масъалартту щаллу бавривух гьуртту хьун бюхъансса шартIру щаллу даву.
Жагьилтурал проектру билаятрал бакI­чинан даши дирзунни. Миннащалсса ихтилатраву Владимир Путиннул чIурчIав дунни уку-укунсСа проектирдал агьамшиврий, хIакьинусса кьини ми чара бакъа аьркиншиврий.

ХIадур бувссар
Бадрижамал Аьлиевал