«Ттул Дагъусттан» тIисса конкурсрайнсса заявкар­тту кьамул даврин хас бувсса брифинг хьунни Дарбантлив, «Цитадель «Нарын-Кала» тIисса архитектуралул комплексраву, августрал 2-нний.

ХIасан Аьдилов
Брифинграй гьуртту хьунни ДР-лул ХIукуматрал председатель Артем Здунов, ДР-лул БакIчинал ва ХIукуматрал Администрациялул каялувчи Владимир Иванов, «Ттул Дагъусттан» конкурсрал экспертътурал каялувчинал хъиривчу Юлия Лузанова ва конкурсрал ялув бацIай советрал члентал: ДР-лул БакIчинал маслихIатчи Илияс Маммаев, Да­гъусттаннал халкьуннал хозяйствалул институтрал ректор ЯхIия Бучаев, ДР-лул Халкьуннал Мажлисрал председательнал хъиривчу Елена Ельникова.

Брифинг тIитIлай, Артем Зду­новлул барчаллагь кунни конкурсрай гьуртту хьун кьаст лар­хIуминнахь: «Конкурсрай гьур­тту хьунсса заявкартту чирчуми циняв ххув хьумири, цанчирча ми хIадурну буну тIий зун цалва агьалинал цIаний».
ХIукуматрал Председательнал бусаврийн бувну, цаппара министерстварттал ва ведомстварттал баян бувну бур конкурсрай ххув хьуминнаща бугьан хьунсса, цIана илкинну ливчIсса, кIанттурдая. Мукунсса кIанттурду бур ДР-лул Шяраваллил хозяйствалул министерствалий, Промышленностьрал ва энергетикалул министерствалий, ДР-лул БакIчинал ва ХIукуматрал Администрациялий ва чIявусса цаймигу. Ми бакъасса, зузи кIанттурду бур цаппара ГУП-ирдаву, цIуллушиву дуруччаврил, дуккаврил идарарттаву.

[dropcap]В[/dropcap]ладимир Ивановлул бусаврийн бувну, конкурсрал сайтрайн бувкIун бур 11 азарунния ливчусса чагъарду. Миннувасса чIявуми бур конкурсрай гьуртту хьун ччиминнал чивчусса. ЧIявусса инсантал барчаллагьрай бур конкурсрай ххув хьуми давурттайн буцаврихлу. Заявкартту чIярусса дуркIун дур Москавлияту, Москавуллал улклуяту, Ставрополлал улклуяту, Санкт-Петербурглия ва Ханты-Мансийскаллал автоном округраяту. Документру буллуну бур Аьрасатнал дазул кьатIув ялапар хъанахъиминналгу, масалдаран, бур США-навату, Украиннавату ва Прибалтиканавату.
«Жу бувчIин барду конкурсрай гьуртту хъанахъиминнан республикалияту лавгсса дагъусттанлувтураща бюхълай бушиву, ма­хъунмай зана хьуну, Дагъусттаннан мюнпат­ранну зун», — увкунни Ивановлул.

[dropcap]Ю[/dropcap]лия Лузановал бусаврийну, конкурсрал хъиривмур шачIану сакин хьун тIий бур 2 бутIуя: управлениялул зузалтран кьимат бищаву ва конкурсрай гьуртту хъана­хъиминнал эссе чичаву. Эссе чичлачиссар кандидатнал савав кIул дан, хIуччардан кьимат бищуншиврул. Эсселува чIалантIиссар инсаннал аьмсса культуралул даража, аькьлу-пикрилул куртIшиву ва цаймигу.
Журналистътурал суаллахьхьун жавабру дуллай, Артем Здуновлул кIицI бунни конкурсрай гьур­тту хъанахъими хъинну хIадур хьуну бушиву.

ДакIнийн бутанну, конкурсрал кIилчинмур шачIану – манзилданийсса язи бугьаву (дистанционный отбор) хъанахъиссар августрал 5-нний, му кьини гьурттучитурал дуцIин дантIиссар онлайн-тест ва ххал бигьинтIиссар миннал чивчу­сса эссе.