Цадакьалун дикI дарчIунни

Хасну лакрал шаннагу райондалул агьалинан кумагру буллалисса «Инсан» ИхIсандалул фондрал Кьурбан-байрандалул гьантрай август зурул 21-ннийра дайдирхьуна «Гьарцагу мюхтажсса къушлийн дикI» тIисса акция.

П. Рамазанова
Фондрал зузалтрал ва волонтертурал шаннагу райондалийсса ятинтурайх ва ахIвал кIюласса кулпатирттайх дикI дарчIунни. КIицI лавгсса фонд­рал вакил Ансар Сулаймановлул бувсунни шаннагу райондалийсса 120 кулпатрайх 620 килограмм дикIул дарчIушиву ва дакIнихтуну барчаллагьрай бушиву ва акциялуву гьуртту хьун ка кIидархIуминнайн.

Ванал бувсунни, гьар шинах цадакьа буван ччисса инсантал фондрайн буклай, цIухху-бусу буллан бикIайшиву, мунияту хIайван биххан ччисса инсаннан къулайсса шартI дузал дуршиву: 6500 къуруш фондрал сияхIрайн дирчуну, телефондалувух оьвкуну, кьурбан биххан тапшур буваву. Шиккува кIицI лаганна, чIявусса инсантурал укун фонд­рал карточкалийн арцу дирчушиву.
Ва фондрал аьмну республикалий 3139 кулпатравун диян дурну дур 27 328 килограмм дикIул. Гьаннайсса, 27 тонна дикIул.