Лакку билаят. Ший ххяххайсса дарувсса уртту-тIутIал хIат-хIисав дакъар. Бунияла, учин бучIир ва бур тIабиаьтрал хIасул бувсса уквасса «аптека» куну.
[dropcap]К[/dropcap]IицI дуванна цаппара нара ишла дувайсса уртту-тIутIал цIарду: улчча, неххал чIапIи, хIухчил чIапIи, сувра, шанчIапIул тIутIив, кIяла тIутIив (чIаклул тIутIив), гулмадаран, ттуккул цIу, къягъул тIама ва цаймигу. Жула нитти-буттахъал махъсса шиннардийннин мудангу ишла дувайва къягъул тIаннул чяй – хIачIангу нахIусса, чурххангу хъинсса, ялун урган ишттахIсса рангиращалсса чяй.
Ттун цалчин стаканнава чяй хIачIлай ккавкссар, нава чIивини, буттауссихъачIа – ЧаринмаммахъачIа. Ттул буттауссу дяъви байбивхьусса чIумал ва ганиннин Азирбижаннаву къалайчину зий ивкIссар. Армиялийнгу тихава увцуссар. Мунияту вайнначIасса чяй хIачIаву дикIайва ца махIатталсса ишну чIалай.
[dropcap]В[/dropcap]анал цалва бувсса качар гъагъай къяцIагу бикIайва. Гай качар цивппагу чIирисса къутилуву хьхьичI бишайва. Яла дувссилул чяйникIраву чяйгу дурну, ширван дархIуну, байбишайва хIачIлай. Зунттаву цайминначIа ххал къашайсса махIатталшиву! Гьай-гьай, ттунгу, чIивисса оьрчIан, гайнначIан лавгни, ругьлу дакъа, чяй хIачIланнин ялугьлан икIайссияв. Укун къяцIух гъавгъсса качар мазралун бувтун чяй хIачIлачIаву чIявуссаннан къакIулнугу бикIайва, хъярчирдайгу бикIайва. Ттула бава, аьпа биву ХIурия, дикIайва: «ЧяйлучIан Чариннул Марияннул къяцIагу нани байссар», — тIий.
Дарбантливсса чяйханарттавугу дикIай самовардавусса чяй. Амма ттун уттигу чувчIав Дарбантливсса чяйханарттаву кунна нахIусса, тунтсса, тIааьнсса чяй бакIрайн къадагьссар. Ца ппурттуву МахIачкъалалив Родопуллал паркраву бикIайссия чяйхана. Гиккугу чяй дуллай азирбижан миллатрал хъамитайпа бикIайва. Ганил дурми чяйгу нахIусса дикIайва. Азирбижан миллатрал инсантал цивппава бур чяйлул пишакартал. Чяй давривугу, гьай-гьай, дикIайссар цила кьюлтIшивуртту.
[dropcap]В[/dropcap]ана, уттигъанну ттунгу, ттучIан бувкIсса хъамаллурангу бахтти хьунни ттул ссил Наркизатлул самоварданува чяй хIачIан. Вай жура, арамтурал, дурссия. Укун чяйлул стакангу хьхьичIун бувгьуну, яруннал хьхьичIсса зунттахгу уруглай, чяй хIачIлачIисса лахIзалучIан цир дияйсса? Мукунсса чIумал, дакIнил макьугу даркьуну, оьрмулул шиннал бущигу хIурхIа хъанан бикIай. ХIачIлачIияра чяй самоварданух!
