[dropcap]Н[/dropcap]а ура оьрмулул 83-мур шинайх нанисса, щала оьрмулий Лакку билаятрай, буттал шяраву, ялапар хъанахъисса инсан. Вай махъсса 10-15 шинал мутталий,
жула миллатрал дагьанину хъанахъисса «Илчи» кказитрайгу, аьлимтурал дуллалисса макьаларттаватугу, личIи-личIисса батIавурттай интеллигенциялул вакилтурал буллалисса ихтилатирттаватугу ялун личлачисса цIурувкьюсса масъалану бур ниттил маз – лакку маз бухлаган къабитаву, хъирив нанисса никирттайнгу биян буван аьркиншиву.
Ва иширал хIакъиравусса ттуламур пикригу ашкара буван ччан бивкIунни, сайки ттула щала оьрмулий даймургу, дитаймурну лакку кIанттуцIунгу, лакку мукъуцIунгу, ниттил мазрацIунгу дархIусса душивугу хьхьичIун лавсун.
[dropcap]Л[/dropcap]акку мазрал тагьар шиная шинайн ссуссукьу хъанай душиврул «леххаву» гьаз дуллалиминнал чIурду чIявуссаннан, хаснува власть канихь думиннан, къабаллалавур ванил хъунмур бала.
Лакку маз хъирив нанисса никирттан ябуван бюхъаншиврийнсса умуд цукунни бишинтIисса, лакку билаятрай лакку маз ишла буллалисса инсантурал аьдад шиная шинайн чан хъанахъийни? Вания тихунмайгу жула шяраваллаву циксса инсанталли личIантIисса лакку мазрай ихтилат буван бюхъайсса, агарда Аьрасатнал ва Дагъусттаннал хIукуматирттал зунттал халкьуннал чулухуннайсса политика, даххана къархьуну, цIанасса тагьарданий личIарча.
Дагъусттаннал хIукуматрал кьамул бувсса, зунттал агьалинал оьрму ххуйшаву мурадрайсса, хIукмурдал хIасиллугу хъюртул щинайн дурксса дур. Шяраваллаву агьали янин чIаланну бухлаглай най бур, школарттай дуклаки оьрчIру чан хъанай бур, инсантурал оьрмулул шартIру ссуссукьу хъанай дур, шяраваллаву анжагъ оьрмулул бугьара хьусса къартту-къужри бакъа личIлай бакъар. ЧIун дуркIукун, вайгу ялату гьанссар – икъавчIай дарув ттигу ляхъан бувну бакъархха.
Укунсса тагьар хIасул дуллалисса политика хIукуматрал дачин дурну дуни, ниттил маз буруччаврил масъала «оьрчI хъяврин бан хъалул ххункIну» чIалай бур. Лакку билаятрай лакку мазрай гъалгъа тIунсса инсантал къаливчIукун, лакку маз бухлагантIишиву чIалачIисса зат бур.
Зунттаву инсантал бацIан бансса мурадрайсса политика хIукуматрал дачин дуварчанни, ниттил мазгу къабивчIаншиврийн умуд бишин бюхъантIисса. Шагьрурдай ягу цайми миллатирттал дянив ялапар хъанахъисса лакку инсантурайхчIин лакку маз ябуван къабюхъантIишивугу аьлтта чIалачIисса зат (хIучча) бур.
Аьрасатналгу, Дагъусттанналгу Конституциярттай оьрус мазращал архIал миллатирттал мазругу паччахIлугърал мазрур тIий чивчуну бунугу, цукунни лакку маз паччахIлугърал мазну хъанахъисса, паччахIлугърал цавагу идаралун лакку мазрай чивчусса цукунчIавсса документ аьркиннугу, тIалавнугу бакъани?
Замана баххана хъанахъиссаксса лакку мазгу ялу-ялун мискин хъанай бур. ЧIявусса махъру лакку мазрава бакъа хъанай бур, ягу ишла къабуллалаврийну хъамабитлай бур. ЦIанасса жагьилтуран, дуклаки оьрчIан кIулссарив укунсса лакку махъру: кIусси, чаг, къушкъун, муркку, хьуннути, тIахIни, гугут, дахъни, аьссайкIи, шагьниз, хума, ччин, ккункку, ланттулахIи, урун, тIурби, щетIмант, тIамакь, парш, кучча, арчимай, кьяй, зянкьа, ххутIала, кьалакьи, цIабиркь, су, къянцIа, ламачи, буцур, вярчIу, аьрабу, къиринти, гьарацIи, къалттухъ, кIара, чIаму, чапар, кIурглу, маркIачIи, гьанавруту, сунчи, ссугъанча, чахтIи, ххиххузи ва чIявусса цаймигу, буттахъал заманнай лакку мазраву ишлану бивкIсса аслийсса лакку махъру.
[dropcap]Ч[/dropcap]ан-чанну тIий лакку маз, хъуншатлул оьрватIи кунма, бюкьан най бур оьрус мазрал, личIи-личIисса чIявусса цаймигу сававрттайну. (Ми сававртту кIицI дулларчан, ихтилат лахъисса хьунтIий бур).
…Лакку маз ябансса ххуллий хьунадакьлакьисса чIярусса дайшишрурттал ялун ца цамургу захIматшиву диян най чIалай дур. Аьрасатнал ПаччахIлугърал Думалуву депутатътал ххал дигьлай бур «КIулшиву дулаврил кьанундалий дахханашивуртту даву» тIисса проект. Му проектрал мяъна-мураднугу хъанай бур школарттай дуклакисса оьрчIахь ихтияр душиву, цанма къаччай бухьурчан, цала ниттил маз лахьхьайсса дарсирдайн къазанан. КIулсса зат бур, школаттай дуклакисса оьрчIахь дишайсса ниттил мазрал дарсру цайми предметиртталми дарсирдаяр хъинну чансса душиву. Му бур ниттил маз бигьанма чулухух бишаврийнсса тIайланмасса ххуллу, му мурадрайсса хIиркI. Миллатрал маз бухлавгукун, миллатрал цIагу, культурагу, тарихгу, тIул-тIабиаьтгурхха дакъа-къатIа хъанахъисса. Ххал дигьлагьисса проектрал автортурал бакIравун мукунсса пикри буххаву ягу, бувххунгу бунува, мунил дард дакъашиву махIаттал хьунсса иш бур.
[dropcap]О[/dropcap]ьрус маз бур гьанусса паччахIлугърал маз. Му маз къакIулссагу паччахIлугърай цучIав икIан къааьркинни, личIи-личIисса миллатирттал инсантурал дянивсса дахIаврил маз бушиврийн бувну.
Миллатирттал мазру буруччаврийхчIин ци заралли оьрус мазран хъанахъисса? Ттул пикрилий, «дахханашивуртту даврил» проект закондалийн кIура даяву хьунтIиссар ПаччахIлугърал Думалул депутатътурал чулухасса багъишла битан къабучIисса гъалатIну, миллатирттал инсантурал дянив рязи бакъашиву сукку дувансса хIуччану.
Умуд бишинну Лакку билаятрал шяраваллаву лакку маз ишла буллансса агьали чIяву шаву мурадрайсса шаттирду хIукуматрал чулуха хъананшиврийн. Амма, хIакьинусса тагьар хIисавравун ларсукун, му умуд щялусса бикIан бюхъайшиврул буруккин дакIнил куртIнивун ццихь тIий бухлай бур. (Лакку мазрай итабакьлакьисса кказит-журналлал тиражру чан хъанахъаву, буккултрал аьдад чан хъанахъаву, кказит-журналлу буруччинсса ка-кумаггу, ургъилгу хIукуматрал чулуха ссуссукьу хъанахъаву ва м.ц.).
«Бакъухъ, бакъухъ» тIий, цимил тикрал булларчангу, кьацI нацIу къашайсса кунма, жува лакку маз буруччаврил чулухунмай циксса ихтилатру булларчангу, лакку мазрал сий ялу-ялун чан хъанахъисса «процессрал» хьхьичI бару буван щищачIав хъанайгу бакъар, хьунтIийгу бакъар, цIанасса оьрмулул зунххи ххуллурдал ххиххузив хIисавравун ларсукун.
Жунма ччинугу-къаччинугу, шагьрурдай ялапар хъанахъисса чIявуми лакрал миллатрал кулпатирттаву оьрус мазрай гъалгъа тIутIаву цила нирхиравун дагьну дур. ОьрчIру-душру кьатIув бусса чIумал, цайми миллатирттал оьрчI-душваращал оьрус мазрай гъалгъа тIий бур. Щищар укунсса иширттан къадагъа дуван шайсса?
Ттула пикри тасттикь буван, бусанна ца укунсса ишираягу. Ванияр шанна шинал хьхьичI МахIачкъалалив хьунаавкьуссияв ттуна ххуйну кIулсса лакрал миллатрал ца гьалмахчунащал. МуначIан хъамалугу лавгра. Кулпатраву оьрчI-душру (3) нитти-буттащал гъалгъа тIий бия оьрус мазрай. Цавагу лакку махъ оьрчIал чулуха ттун вайннанний къабавуна (ва гьалмахчунал цIа кIицI къаданна, ванан къаччан къабикIаншиврул). Ттун тIааьн къабивзуна вайннал къушлий лакку маз ишлану бакъашиву. На тIайланма цIувххуссия гьалмахчунахь, ниттил маз кулпатраву ишлану бакъашиврул савав цир увкуну. Гьалмахчу цувагу, лакку мазрай гъалгъа тIий унува, анавархъиндарай оьрус мазрайн учIайва. Ласгу, щаргу дурккусса, мяърипатрал уздансса лакрал миллатрал инсантал бунугу, лакку маз вайннанний бувагу сийлий бакъашиву чIалай бия. Гьалмахчунал тIурча, на буллусса суалданухьхьун укунсса жаваб дуллуна:
«Дус Чанкурай, ттун ттуршийла бигьар оьрус мазрай ихтилат буллан, лакку мазрайнияр. Лакку мазрай ттула пикри балжийну ялун личин буван захIматну бикIай. Жула лакку маз мискинсса маз бур».
Цир шикку учин?!
Чанкура КьурбанмахIаммадов,
ДР-лул культуралул лайкь хьусса зузала,
ш. Хъусращи
