Ларгсса нюжмаркьини, август зурул 10-нний, Дагъусттаннал ХIукуматрал хъунаманал хъиривчунал къуллугърайсса (врио) ХIажимахIаммад ХIусайнов гьуртту хьунни Аьрасатнал вице-премьер Виталий Муткол каялувшиндаралусса видеоконференциялий. Микку ххал диргьунни 2025 шиналнинсса, Аьрасатнал социал-экономика хьхьичIуннай хъит учин даву мурадрайсса, Стратегиялул проект.
П. Рамазанова
Виталий Муткол дакIнийн бувтунни Аьрасатнал хIукуматрал председатель Дмитрий Медведевлулгу дуршиву кIа ялув кIицI лаглагисса Стратегиялул проект ххал дигьлагьисса батIаву ва мукунна проект цайми кIанттурдайгу ххал диргьушиву. Бувсунни цIанакул Аьрасатнал хIукумат зий душиву магистрал инфраструктура ххуйсса даражалийн дуцавриха ва регионнал маслихIатругу хIисавравун ласунтIишиву.
Стратегиялул проект щаллуну хIадур дувайхту, жяматрал пикри бусаншиврул, кказитирттай рищунтIий бур.
Дагъусттанналмур хIукуматралгу федерал лагрулийсса инфраструктуралул объектру дуваврил ва дакьин даврил ялувсса хIадуршин дурну дур, ми цIусса объектру дувайхту, цIусса зузи кIанттурдугу хьунтIий бур ва республикалийн инвестицияртту кIункIу хьун дантIий бур. Мунияту республикалул хIукуматрал кIа проектрах дагьайкунсса къулагъас дуллай бур.
Мероприятиялий гьуртту хьунни ДР-лул экономикалул ва территориял развитиялул министр ХIусман ХIасбулатов, транспортрал ва ххуллул хозяйствалул министр Ширухан ХIажимурадов, строительствалул ва ЖКХ-лул министрнал хъиривчу Залкип Залкипов, республикалул БакIчинал ва ХIукуматрал Администрациялул проектирдал управлениялул хъунама Нюсрет Оьмаров ва цаймигу къуллугъчитал.
