Дяркъусса щинал ххув

Уттигъанну, ахттая махъ, хьунив ххуллийх хьуну, Ваччату Вихьлив най уссияв. Ва ххуллу, Хъуннех чIалачIисса ЧIяйннал арнил лултту най, Хъюйннал шяравунсса аьра ххуллийн буклай буссар. Га цурдагу хъинну баргъ кIири бувсса кьини дия.

ХIажимурад ХIусайнов
Хъюйннал шяравун бухлахисса кIанттай, цалчинми къатрава бувккун, урчIра-ацIра шинава ливчусса кIия оьрчIал ттул хьхьичIун дяркъусса щинал куружка дургьуна. На гайннан цала къатрайн къаршисса бакIъялавай ххуллийх най ххал хьуну ияв. Дяркъусса щинал нахIала байхту, гьай-гьай, ххан­хха бигьалавгуна. Гайннахь барчаллагь куну, оьрму лахъи баннав куссия.

Бунияла, жува ца-ца чIумал, ялун нанисса никирай рязий бакъа, гайннай аьйрду дуллан бикIару, гайннан тарбия дулавугу жуйнма хъарсса иш бунува. Школалийсса учительтурал дуллалисса тарбиялуцIун, хъунмасса кIану бугьлай бур оьрчIал нитти-буттал дуллалимур тарбиялулгу. Тарихрал луттирдаву, миллатирттал аьдатирттаву, диндалул тIутIимуниву хьуннав, мякьсса инсаннан щинал ххув булаврияр хъунмасса чири ба­къашиву кIицI буллай бур. Ши­ккува кIицI буван ччива, лажин-ка шюшлашисса инсаннал каруннайн щин рутIавугу хъунма­сса чирилун ккаллину бушиву.

Ттун хъунмасса барчаллагь учин ччай бур вай оьрчIал нитти-буттахь, вай дуклакисса Ваччиял школалул учительтурахь. Зу укунсса тарбия дуллалисса оьрчIалли буруччинтIисса Лакку билаятгу, ялун бучIантIимургу.