ЦIусса министр, цIусса хьул-умуд

Август зурул 6-нний Журналистътурал къатлувун увкIунни Респуб­ликалул ХIукуматрал хъунама Артем Здунов, информатизациялул, связьрал ва массовый коммуникациярттал цIусса министр цIакь уван.

П. Рамазанова
Мунащал бия республикалул БакI­чинал ва ХIукуматрал администрациялул информациялул политикалул управлениялул хъунама Зубайру Зубайруев ва цаймигу къуллугъчитал.

Сергей Снегирев чIумуйнусса информатизациялул, связьрал ва массовый ком­му­никациярттал министрнал къуллугърай цIакь увайхту, Артем Здуновлул кIицI лавгунни хIакьину информациялул ва цифровой технологияртту оьрмулу­ву ялу-ялун сийлувун дагьлай душиву, кьатIаллил билаятирттай миннул бияла хьхьичIунну бушиву ва жунмагу му ишираву махъун багьлан къабучIишиву. Бувсунни цIусса министрнал му даву сантирайн рутанссар тIисса умуд бушиву.

«Печатьрал ва информациялул экс-министр Рашид Забитович филологиялул элмурдал доктор ур, мунан ччан бив­кIунни хьхьичIрамур даврий, Дагъусттаннал университетрал преподавательну зун, цала даврил опыт ва кIулшивуртту журналистал хъанахъиминнан ла­хьхьин дуллай зунтIиссар уттиния тинайгу», — увкунни Артем Здуновлул.

Рашид Акавовлул министерствалул коллективрахь барчаллагь увкунни, бю­хъулий ва сантирай зий бивкIсса цинявн­нахьвагу.
Сергей Снегиревлул барчаллагь увкунни къабигьасса даву цайнна вихшала даврихлу ва бувсунни хIарачатрай зунтIишиву министерствалул хъачIунттайсса хъар лайкьну ларсун ачин.
«Илчилул» коллективгу дакIних­туну барчаллагьрай буру Ра­шид Забитовичлуйн, ва къабигьасса чIумал журналистикалул, печатьрал даву ххуй­сса даражалийн гьаз дувансса бюхъулий зий ивкIун тIий. Журналистътурал кьюкьлуву му хъинну авкьусса ия, сийлий, хIурматрай ия.

Сергей Снегиревгу уттинингу министр­нал хъиривчуну зий ивкIсса, журналистикалул ва журналистътурал къайгъурду ххуйну кIулсса ухьувкун, ххуй чулийннайсса дахханашивуртту мунал цIаницIун дахIинсса умудрай буру, тIайлабацIу чIа тIий буру. Миллатрал прессалул масъаларттах къулагъас ххи дуванссар тIисса умудрай, уртакьну зун хIадурну буру.