Ттул умуд бур нава «Илчи» кказитрал буккултрал ба­гъишла итанссара цIунилгу Ххяллухиял шяраваллил чулин­май­сса ттула пикрирду ххи буллай ушаврихлу тIисса.

ХIажимурад ХIусайнов
[dropcap]В[/dropcap]а шяравалу диркIсса кIану ттунма ххал шайхту, гикку чарий чару къабивтун инсантурал бувхху­сса сурат ххал шайхту, ттул чур­ххал макьу хъинну зия хьуна. Дурагу ца лиссу чарттал дия не­ххал ялув­сса бакIуй лирчIун, шяраваллил лишанну. Шяравалу диркIсса бакIурдал дянийх нанисса щинал нахIушиврулгу ахир-зума дакъая. Лагмасса лахъсса ххяллал, кIайннул ли­ссурдал буслай бия циван дирзссарив ва шяраваллин Ххяллухи тIисса цIагу.

Уттигъанну на ккалай уссияв жула лакрал шаэр Миясат Муслимовал шеърирду. Вай бия хас бувну вана укунсса, жура «къирмишан» дурсса, шяраваллан. Гьай-гьай, гьакссагу зулму бувну бизан бувну бивкIун бур жула инсантал араннавун. Ва цава. Амма, гай бизан буллалийни жунма кIуллихха ца чIирисса аьрава кIива кулпат­ран хIисавну дуланмагъ дишин дуллуну диркIшиву. Къатриния кIиккура лирчIун диркIссар. Ци дурссар кIайннул аьш-бакI? Ахиратравун лавгсса инсантал кIайннал чув буччайнавав? Хъун ЦIувкIуллал хIатталлив буччайнавав? КIикку цавагу кIалабарз бакъая. Юхссагу къат­рал чарттащал хIатталливсса кIалабарзругу лавсун лавгссарив инсантурал?

Гьай-аман, ванахха жуйхра Аллагьнал ришлай. Гьич къабучIиссар инсаннал рухIирал «къатлуйн» ка щилан. Египетнаву тарихрал тIитIалартту дуллалисса чIявусса аьлимтал, ти­чча зана шайхту, къашавай хьуну ливтIуну бур.
Ялагу, Ххяллухиял шяравалу диркIсса бакIайх заназийни, ттун хIисав хьуна, кIиккун цимигу шинай, рухI дусса инсан ча учIави, ризкьивагу бувкIун бакъая. Ялагу, бюхълай бухьурча, на тавакъю бавияв Миясат Муслимовахь, Ххяллухиял шяравун насу куну.

Гьай-гьай, ттун ялагу ччан бивкIунни дунияллий ухьурча кIа шяраваллицIун мархри бавхIусса инсан, бучIия шяравалу диркIсса бакIурдива цанний аьпалул ула дацIан дуван.
Шиккува кIицI буван ччива ялагу ца укунсса зат. Ва кIану ттун чIалан бивкIунни инсаннал аьрщарахсса ччаврил гьайкалну. Циван учирча, кIукун ххяллаву къатригу дурну яхъанан щища-бунугу къашайссар. Думур ядувара, дакъамунил хъирив бизияра!